مەرزىمدى اسكەري قىزمەتتەگى ساربازداردىڭ نەسيە ماسەلەسى قالاي شەشىلەدى

استانا. قازاقپارات – ق ر قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستار دەپارتامەنتىنىڭ باعىت اعا وفيتسەرى رۋسلان تاپاشيەۆ مەرزىمدى اسكەري قىزمەتتەگى ساربازداردىڭ كرەديتىنە قاتىستى كانيكۋلى تۋرالى ايتىپ بەردى، دەپ حابارلايدى قازاقپارات ءتىلشىسى.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا تىلشىلەر مەرزىمدى اسكەري قىزمەتتەگىلەرگە كرەديت بويىنشا كانيكۋل بەرۋ مۇمكىندىگى تۋرالى سۇرادى.

«قارۋلى كۇشتەر قاتارىنا شاقىرىلعان 7 مىڭ ادامدا نەسيەسى بويىنشا تولەم جاساۋ مەرزىمى ءوتىپ كەتكەن. ولاردىڭ وسى ماسەلەسى قالاي شەشىلمەك؟» دەپ سۇراق قويدى ءتىلشى.

«جاستار اسكەرگە شاقىرتىلعان كەزدە اسكەري كوميسساريات ارقىلى ولارعا ءتيىستى انىقتاما ۇسىنىلادى. ەگەر ولار شاقىرتۋ كەزىندە ءتيىستى انىقتامانى الماسا، وندا اسكەري بولىمدەگى كومانديرى ءتيىستى قۇجاتتى بەرەدى. بۇل انىقتامانى نەسيەسى بار ساربازدار بانكتەر مەن قارجى ۇيىمدارىنا تاپسىرادى»، - دەدى ر. تاپاشيەۆ.

ونىڭ ايتۋىنشا، اسكەر قاتارىنداعى ساربازدار تۋىستارىنىڭ اتىنا سەنىمحات بەرە الادى. وسى ورايدا ساربازدىڭ جاقىندارى بانككە ءتيىستى ءوتىنىمدى تاپسىرادى.

ايتا كەتەيىك، ق ر قارۋلى كۇشتەرىنىڭ قۇرالىمدارىنىڭ قاتارىندا مەرزىمدى اسكەري قىزمەتىن وتكەرگەن ازاماتتار ءۇشىن ج و و- عا ءتۇسۋدىڭ جەڭىلدىكتەرى قاراستىرىلعان.