اسلامبەك مەرعاليەۆ پرەزيدەنتكە سوت رەفورماسى قالاي ءجۇرىپ جاتقانىن باياندادى

استانا. قازاقپارات - مەملەكەت باسشىسى جوعارعى سوت ءتوراعاسى اسلامبەك مەرعاليەۆتى قابىلدادى، دەپ حابارلايدى اقوردا.

پرەزيدەنتكە زاڭ ۇستەمدىگىن قامتاماسىز ەتۋگە جانە سوت تورەلىگىنىڭ ساپاسىن ارتتىرۋعا باعىتتالعان سوت رەفورماسىنىڭ جۇزەگە اسىرىلۋ بارىسى تۋرالى مالىمەت بەرىلدى.

جوعارعى سوت ءتوراعاسى رەفورما جونىندەگى ۇسىنىستاردىڭ شۇعىل شارالار، زاڭنامالىق باستامالار جانە ۇزاقمەرزىمدى مىندەتتەر سەكىلدى ءۇش توپقا بولىنەتىنىن اتاپ ءوتتى.

شۇعىل شارالار اياسىندا مىندەتتى تۇردە وففلاين وتكىزىلۋگە ءتيىس پروتسەستەر ءۇشىن سوت زالدارىن اشۋ، سونداي- اق اناعۇرلىم شەتىن سالالار بويىنشا جوعارعى سوتتىڭ نورماتيۆتىك قاۋلىلارىن جاڭارتۋ ماسەلەلەرى جوسپارلانعان.

اسلامبەك مەرعاليەۆتىڭ ايتۋىنشا، ءىستى سوتقا دەيىنگى قاراۋ ساتىسىنا ءتيىمدى سوت باقىلاۋىن ەنگىزۋ، مەملەكەتتىك ساتىپ الۋ، سالىق سالۋ جانە جەكە سوت ورىنداۋشىلارىنىڭ قىزمەتى سالالارىندا اكىمشىلىك ىستەردىڭ قارالۋ مەرزىمىن قىسقارتۋ ماسەلەلەرى زاڭنامالىق باستامالارعا جاتادى.

ۇزاقمەرزىمدى جۇمىس تارتىبىندە كەشەندى زاڭنامالىق جانە ۇيىمداستىرۋ شارالارىن ازىرلەۋ قاراستىرىلعان. قازىرگى ۋاقىتتا پارلامەنت قاراۋىندا ەكى زاڭ جوباسى جاتىر.

ولار سوت ءتوراعالارىن سايلاۋ ارقىلى تاڭداۋ ءتارتىبىن ەنگىزۋگە، كۇشتىك قۇرىلىمداردىڭ سۋديالارعا قىسىم جاساۋ جولدارىن جويۋعا، جوعارعى سوت كەڭەسىنىڭ قۇزىرەتىن كۇشەيتۋگە جانە يۋۆەنالدى سوتتاردىڭ قاراۋىنا جاتاتىن ىستەردىڭ اياسىن كەڭەيتۋگە باعىتتالعان.

بۇدان بولەك، قىلمىستىق پروتسەستە تاراپتاردىڭ جارىسپالىلىعى قاعيداتىن قامتاماسىز ەتۋگە جانە زاڭدى ورەسكەل بۇزعانى ءۇشىن سۋديالاردى جاۋاپكەرشىلىككە تارتۋ مەحانيزمدەرىنە قاتىستى ۇسىنىستار ازىرلەنىپ جاتىر.

مەملەكەت باسشىسى سوت جۇيەسىن ودان ءارى جەتىلدىرۋ شارالارىن ساپالى جۇزەگە اسىرۋ قاجەت ەكەنىنە نازار اۋداردى.

فوتو: akorda.kz