ماۋلەن اشىمبايەۆ: پرەزيدەنت پەن حالىق سەنىمىن اقتاۋعا بار كۇش- جىگەرىمدى جۇمسايمىن
«بۇگىنگى پالاتا وتىرىسىنا پرەزيدەنتىمىز قاسىم- جومارت كەمەل ۇلى توقايەۆ ارنايى كەلىپ قاتىستى. كونستيتۋتسياعا سايكەس، پرەزيدەنتىمىز سەنات ءتوراعاسى قىزمەتىنە كانديداتۋرانى ۇسىنىپ، ماعان زور سەنىم ءبىلدىردى. بۇل - مەن ءۇشىن ۇلكەن جاۋاپكەرشىلىك. سىزدەر مەملەكەت باسشىسىنىڭ ۇسىنىسىن قولداپ، داۋىس بەردىڭىزدەر. سول ءۇشىن وزدەرىڭىزگە العىسىمدى بىلدىرە وتىرىپ، پرەزيدەنتىمىزدىڭ جانە حالىقتىڭ سەنىمىن اقتاۋ ءۇشىن بار كۇش- جىگەرىمدى جۇمسايمىن دەپ سەندىرگىم كەلەدى»، - دەدى ماۋلەن اشىمبايەۆ.
سەنات ءتوراعاسى پرەزيدەنت پارلامەنتتىڭ الدىنا جاڭا مىندەتتەر قويعانىن ەسكە سالدى.
«جاڭا مەملەكەت باسشىسى پارلامەنتتىڭ الدىندا تۇرعان باستى مىندەتتەردى بەلگىلەپ بەردى. پرەزيدەنتىمىز وسىعان بايلانىستى ءبىزدىڭ الدىمىزعا ناقتى ماقساتتار قويىپ وتىر. شىن مانىندە اتقاراتىن جۇمىس از ەمەس. اسىرەسە ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان ۋاقتىلى قامتاماسىز ەتۋ اسا ماڭىزدى. سوندىقتان مەملەكەت باسشىسى جۇكتەگەن مىندەتتەردى ساپالى ورىنداۋىمىز كەرەك. وسى جولدا ءبارىمىز بىرگە، ناتيجەلى ەڭبەك ەتەمىز دەپ سەنەمىن»، - دەدى سەنات سپيكەرى.
اۆتور
ەسىمجان ناقتىباي
