جەڭىلدەتىلگەن اۆتونەسيە: ءوتىنىم بەرۋ ءتارتىبى وزگەرۋى مۇمكىن

استانا. قازاقپارات - قازاقستاندا جەڭىلدەتىلگەن اۆتونەسيە الۋعا ءوتىنىش بەرۋ ءتارتىبى وزگەرۋى مۇمكىن.

بۇل تۋرالى يندۋستريا جانە ينفراقۇرىلىمدىق دامۋ ءمينيسترى مارات قارابايەۆ مالىمدەدى، - دەپ حابارلايدى Massaget.kz ءتىلشىسى.

«بەرىلەتىن نەسيە سوماسى 10 ميلليون تەڭگەگە دەيىن بولۋى ءتيىس، اۆتوكولىكتىڭ قۇنى 15 ميلليون تەڭگەدەن اسپاۋى كەرەك. حالىققا كولىكتەر قولجەتىمدى بولۋى ءۇشىن، بۇل باعدارلامادا قىمبات كولىكتەر قاراستىرىلماعان. ءبىز باعدارلامانى ايدىڭ اياعىنا دەيىن باستاۋعا تىرىسامىز»، - دەدى قارابايەۆ ۇكىمەت وتىرىسىندا.

ۆەدومستۆو باسشىسىنىڭ ايتۋىنشا، وسى اپتادا ونەركاسىپتى دامىتۋ قورى بريفينگ وتكىزەدى، وندا باعدارلامانى قايتا باستاۋدىڭ ناقتى كۇنى ايتىلادى.

«بۇل جەردە باعدارلامانىڭ مەحانيزمىن قايتا قاراۋ تۋرالى ماسەلە تۇر. ەگەر بۇعان دەيىن ولار الدىمەن اۆتوسالوندارعا جۇگىنىپ، سودان كەيىن بانككە بارسا، ونەركاسىپتى دامىتۋ قورى باسقا مەحانيزمدى ۇسىنادى: الدىمەن ونەركاسىپتى دامىتۋ قورىنا جۇگىنەدى، وندا ەلەكترون كەزەك بولادى، سودان كەيىن اۆتوسالونعا بارادى»، - دەپ ءتۇسىندىردى مينيستر.

قارابايەۆ جاڭا اۆتوكولىكتەردى ۇزاق كۇتۋ تەك قازاقستاندا بولمايتىنىن ايتتى.

«بۇل كەز كەلگەن ەلدە، ءتىپتى KIA وندىرىلەتىن وڭتۇستىك كورەيادا بار. سونداي-اق، حالىق باسقا دا ماركالاردى، جەكە ماركالاردى 2-2، 5 جىل كۇتۋگە ءماجبۇر»، - دەدى ول.