ەلىمىزدە سۋ تاريفى قىمباتتاۋى مۇمكىن

استانا. قازاقپارات - قازاقستاندا سۋ تاريفى وزگەرۋى مۇمكىن. اتالعان ماسەلە بويىنشا ەكولوگيا مينيسترلىگى قۇزىرلى ورگاندارعا ۇسىنىس ازىرلەپ جاتىر.

بۇل تۋرالى ق ر ەكولوگيا جانە تابيعي رەسۋرستار مينيسترلىگى سۋ رەسۋرستارى كوميتەتى ءتوراعاسىنىڭ مىندەتىن اتقارۋشى دوسبول بەكماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىندە رەسپۋبليكاعا قاراستى 3440 سۋ كانالى جۇيەلەرى بار. شارۋالارعا سۋ سول جۇيەلەر ارقىلى جەتكىزىلەدى. سۋ كانالى جۇيەلەرى كەزىندە كوممۋنالدىق مەنشىكتە بولىپ، كوبى قازىرگى سۋ تاريفىنە كىرمەگەن. ياعني قازىرگى تاريف بويىنشا ولاردى كۇتىپ ۇستاۋعا قارجى قاراستىرىلماعان. وسى ورايدا بيىل ءبىز مەملەكەتتىك قۇزىرلى ورگاندارعا ءوز ۇسىنىسىمىزدى جولدايمىز. كەلەسى جىلى ادىلەتتى سۋ تاريفى بەكىتىلەدى دەپ ويلايمىز»، - دەدى دوسبول بەكماعامبەتوۆ «قازگيدرومەت» مەكەمەسىندە وتكەن باسپا ءسوز ءماسليحاتىندا.

مينيسترلىك وكىلىنىڭ مالىمدەۋىنشە، سۋ قويمالارىن كۇتىپ ۇستاۋ - ۇلكەن ماسەلە.

سونداي-اق، سپيكەر سۋ سالاسى ماماندارىنىڭ جالاقىسى ماسەلەسىن كوتەردى.

«سۋ سالاسى قىزمەتكەرلەرى - ەلىمىزدەگى ەڭ تومەن جالاقى الاتىنداردىڭ ءبىرى. سوندىقتان دا پروبلەمانى تاريف ارقىلى شەشپەسەك، باسقا جولى جوق. مەملەكەتتەن قارجى المايمىز، قانشا كولەمدە سۋ جەتكىزەمىز، سونى اقىسىن شارۋالاردان جيناپ الامىز»، - دەيدى ول.

دوسبول بەكماعامبەتوۆتىڭ دايەگىنشە، بۇگىندە سۋ سالاسى ماماندارىنىڭ ورتاشا جالاقىسى 90 مىڭ تەڭگەدەن اسپايدى.

بۇعان دەيىن پايدالانۋعا بەرىلگەنىنە 70 جىلدان اسىپ كەتكەن سۋ قويمالارى تۋرالى حابارلاعان ەدىك.