نۇرسۇلتان نازاربايەۆ تەگىن ەمدەلىپ جاتىر ما

None
استانا. قازاقپارات - بۇگىن قازاقستان رەسپۋبليكاسىنىڭ ءبىرىنشى پرەزيدەنتى نۇرسۇلتان نازاربايەۆتىڭ جۇرەگىنە ەمدەۋ-دياگنوستيكالىق پروتسەدۋرا جاسالعانى حابارلاندى.

ەم تەگىن جۇرگىزىلدى مە؟ بۇل ساۋالعا ۇلتتىق عىلىمي كارديوحيرۋرگيا ورتالىعىنىڭ حيرۋرگيا بويىنشا ديرەكتورى يۋري پيا جاۋاپ بەردى، دەپ حابارلايدى قازاقپارات ءتىلشىسى.

«اتالعان ەمدەۋ پروتسەدۋراسى بارلىق ازامات ءۇشىن تەگىن. ونىڭ ىشىندە نۇرسۇلتان نازاربايەۆ تا بار. قارجى جاعىنان العاندا بۇل قىمبات پروتسەدۋرا. قۋانىشقا قاراي، قازاقستان ازاماتتارىنىڭ تەگىن ەمدەلۋ مۇمكىندىگى بار»، - دەدى يۋري پيا ەلوردادا وتكەن بريفينگىدە ب ا ق وكىلدەرىنىڭ ساۋالىنا جاۋاپ بەرە وتىرىپ.

ونىڭ ايتۋىنشا، نۇرسۇلتان نازاربايەۆقا ەل قاتارلى قىزمەت كورسەتىلىپ جاتىر.

«قازىر پاتسيەنتتىڭ جانىندا ەمدەۋشى جانە كەزەكشى دارىگەر بار. «ەرەكشە جاعداي جاسالدى ما؟» دەگەنگە كەلسەك، بىزدە VIP دەگەن تۇسىنىك جوق، بارلىق كليەنت بىردەي»، - دەيدى ول.

سونداي-اق، مامان تۇڭعىش پرەزيدەنتتىڭ كارديوحيرۋرگيا ورتالىعى اشىلعان ساتتەن كونسۋلتاتسيادان ءوتىپ تۇراتىندىعىن جەتكىزدى.

بۇعان دەيىن كارديوحيرۋرگ نۇرسۇلتان نازاربايەۆتىڭ قازىرگى جاعدايى تۋرالى ايتىپ بەرگەن ەدى.

ايتا كەتسەك، بۇگىن نۇرسۇلتان نازاربايەۆقا وتا جاسالعانى حابارلاندى.

«نۇرسۇلتان نازاربايەۆتىڭ جۇرەگىنە وتا جاسالدى. وپەراتسيا ءساتتى ءوتتى. تۇڭعىش پرەزيدەنتتىڭ ومىرىنە قاۋىپ ءتونىپ تۇرعان جوق. وتا ۇلتتىق كارديوحيرۋرگيا ورتالىعىندا تانىمال كارديوحيرۋرگ يۋ. پيانىڭ جەتەكشىلىگىمەن جاسالدى»، - دەپ جازعان ەدى تۇڭعىش پرەزيدەنتتىڭ باسپا ءسوز حاتشىسى ايدوس ۇكىباي Twitter پاراقشاسىندا.

سوڭعى جاڭالىقتار