ءماجىلىس پەن ءماسليحات سايلاۋىنا ۇمىتكەرلەردى ۇسىنۋ بۇگىننەن باستالدى

«كانديداتتاردى ۇسىنۋ سايلاۋدى تاعايىنداۋ تۋرالى جارلىق جاريالانعان كۇننەن باستالادى جانە 20 كۇنگە سوزىلادى، 8- اقپاندا ءار ايماقتا جەرگىلىكتى ۋاقىت بويىنشا ساعات 18.00 دە اياقتالادى. ۇمىتكەرلەردى تىركەۋ 20- قاڭتاردان 18- اقپانعا دەيىن جالعاسادى. سايلاۋ الدىنداعى ۇگىت-ناسيحات 18- اقپان كۇنى ساعات 18:00 دە باستالىپ، 18- ناۋرىز ساعات 00:00 گە دەيىن جۇرگىزىلەدى. 18- ناۋرىز - تىنىشتىق كۇنى. 19- ناۋرىز - سايلاۋ كۇنى»، - دەدى ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ.

سايلاۋ كۇنى ۋچاسكەلەردە داۋىس بەرۋ جەرگىلىكتى ۋاقىت بويىنشا ساعات 07:00 دەن 20:00 گە دەيىن جۇرگىزىلەدى.

«داۋىس بەرۋدى اياقتاۋدىڭ وزگە ۋاقىتى بەلگىلەنبەسە، ۋچاسكەلىك سايلاۋ كوميسسيالارى جەرگىلىكتى ۋاقىت بويىنشا ساعات 20:00 دە داۋىس ساناۋدى، داۋىس بەرۋ ناتيجەلەرى تۋرالى حاتتاما جاساۋدى باستايدى. وسىلايشا، پارلامەنت ءماجىلىسى مەن ءماسليحات دەپۋتاتتارىن كەزەكتەن تىس سايلاۋدىڭ جالپى ۇزاقتىعى - تاعايىندالعان كۇننەن باستاپ داۋىس بەرۋ كۇنىنە دەيىن 59 كۇن بولادى»، - دەدى و س ك ءتوراعاسىنىڭ ورىنباسارى.

بۇعان دەيىن كونستانتين پەتروۆ قانداي ۇيىمدار كانديداتتار ۇسىنا الاتىنىن، كانديداتقا قانداي تالاپتار قويىلاتىنىن تۇسىندىرگەن ەدى.