وتكەن جىلى قانشا لاۋازىمدى تۇلعا تارتىپتىك جازاعا تارتىلدى
بۇل تۋرالى مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقبايەۆ ايتتى، دەپ حابارلايدى قازاقپارات ءتىلشىسى.
«اگەنتتىكتىڭ باسىم باعىتتارىنىڭ ءبىرى - حالىققا ساپالى مەملەكەتتىك قىزمەت كورسەتۋدى قامتاماسىز ەتۋ. قىزمەت الۋشىلاردىڭ قۇقىقتارىن پرواكتيۆتى تۇردە قورعاۋ جانە قالپىنا كەلتىرۋگە ەرەكشە نازار اۋدارىپ وتىرمىز. ازاماتتاردىڭ شاعىمدارىن كۇتپەي-اق، قاشىقتان مونيتورينگ جاساپ، قۇقىق بۇزۋشىلىقتار بولعان جاعدايدا زاڭدىلىقتى ورناتۋ تاجىريبەسىن باستادىق»، - دەدى ول اگەنتتىكتىڭ كەڭەيتىلگەن القا وتىرىسىندا.
اگەنتتىك باسشىسىنىڭ ايتۋىنشا، 2022-جىلى 756 تەكسەرۋ شارالارى جۇرگىزىلدى. ونىڭ ىشىندە الدىن الۋ نەگىزىندە 290 جانە جوسپاردان تىس 466 تەكسەرۋ بولعان.
«تەكسەرۋ بارىسىندا 46 مىڭعا جۋىق زاڭ بۇزۋشىلىق انىقتالدى. 602 لاۋازىمدى تۇلعا تارتىپتىك، 305 ءى اكىمشىلىك جاۋاپكەرشىلىككە تارتىلدى. سوت شەشىمىمەن قىسقارتىلعان ىستەر بولعان جوق. اگەنتتىك تالداۋ جانە مونيتورينگ نەگىزىندە 21 ورتالىق مەملەكەتتىك ورگانعا جانە «ۇلتتىق اقپاراتتىق تەحنولوگيالار» اكسيونەرلىك قوعامىنا بۇزۋشىلىقتاردىڭ الدىن الۋعا جانە قىزمەت الۋشىلاردىڭ قۇقىقتارىن قورعاۋعا باعىتتالعان 1200 دەن استام ۇسىنىس جولداندى. اقپاراتتىق جۇيەلەردىڭ جۇمىسىنا دا مونيتورينگ جۇرگىزىلدى. ونىڭ قورىتىندىلارى پرەمەر-ءمينيستردىڭ اتىنا ەنگىزىلدى. ناتيجەسىندە، سيفرلىق دامۋ مينيسترلىگى اگەنتتىك انىقتاعان كەمشىلىكتەردى جويۋ جونىندەگى كەشەندى جوسپاردى بەكىتتى. جوسپار پورتالدا جۇمىس ىستەمەي تۇرعان 25 ەلەكتروندىق قىزمەتتى قالپىنا كەلتىرۋدى، 9 قىزمەت بويىنشا اقپاراتتىق جۇيەلەردىڭ فۋنكتسيونالىن پىسىقتاۋدى، 11 دەرەكقوردى ىقپالداستىرۋدى كوزدەيدى»، - دەدى دارحان جازىقبايەۆ.
