كامەلەتكە تولماعان بالالارعا قازاقستان پاسپورتىن راسىمدەۋ قۇنى ارزانداماق
بۇل تۋرالى ءماجىلىستىڭ قاراۋىنا بەرىلگەن «سالىق جانە بيۋجەتكە تولەنەتىن باسقا دا مىندەتتى تولەمدەر تۋرالى» زاڭ جوباسىندا كورسەتىلگەن، دەپ حابارلايدى قازاقپارات ءتىلشىسى.
«2020-جىلدان باستاپ اتا-انالارىمەن بىرگە شەتەلگە شىققان جاعدايلاردا 16 جاسقا دەيىنگى بالالار تۋرالى پاسپورتقا جازۋ تالابى الىنىپ تاستالدى. وسىعان بايلانىستى بالالارعا شەتەلگە شىققان كەزدە جەكە پاسپورتتى راسىمدەۋدى تالاپ ەتەدى. بۇل ولاردىڭ وتباسىلارىنا قارجىلىق جۇكتەمەنىڭ وسۋىنە الىپ كەلەدى. وسىعان بايلانىستى كامەلەتكە تولماعان بالالارعا بەرىلەتىن پاسپورتتار ءۇشىن مەملەكەتتىك باجدى 8 ا ە ك- تەن (27600 تەڭگەدەن) 4 ا ە ك- كە (13800 تەڭگەگە) دەيىن تومەندەتۋ ۇسىنىلادى. بۇعان قوسا، شەت مەملەكەتتەرگە ءجيى باراتىن ازاماتتاردىڭ بەلسەندى ساناتىنا ىڭعايلى بولۋ ءۇشىن كوپتەگەن پاراقتارى بار (48 بەت) پاسپورتتى ەنگىزۋ ۇسىنىلادى»، - دەلىنگەن قۇجاتتا.
زاڭ جوباسىنا ەنگىزىلەتىن وزگەرىستەر بەكىتىلسە، قازاقستان پاسپورتى ءۇشىن الىناتىن مەملەكەتتىك باج مولشەرى مىناداي بولماق:
16 جاسقا دەيىنگى بالالارعا بەرىلەتىن 22 بەتتەن تۇراتىن پاسپورت - 4 ا ە ك (13800 تەڭگە)؛
36 بەتتەن تۇراتىن پاسپورت - 8 ا ە ك (27600 تەڭگە)؛
48 بەتتەن تۇراتىن پاسپورت - 12 ا ە ك (41400 تەڭگە).
