ەنەرگەتيكا مينيسترلىگىنە ديزەلدىڭ شەكتى باعاسىن رەتتەۋ قۇزىرەتى بەرىلمەك
بۇل تۋرالى اتالعان ۆەدومستۆو اشىق تالقىعا شىعارعان ۇكىمەت قاۋلىسىنىڭ جوباسىندا جازىلعان، دەپ حابارلايدى قازاقپارات ءتىلشىسى.
«ەنەرگەتيكا مينيسترلىگى باعالاردى مەملەكەتتىك رەتتەۋ بەلگىلەنگەن مۇناي ونىمدەرىن ستاتسيونارلىق اۆتوجانارماي قۇيۋ ستانتسيالارى ارقىلى بولشەك، كوتەرمە ساۋدادا وتكىزۋگە شەكتى باعالاردى بەلگىلەيدى. سونىمەن قاتار الەۋمەتتىك ماڭىزدى ءمانى بار جانە قازاقستان رەسپۋبليكاسىنىڭ ەكونوميكاسىنا ەلەۋلى ىقپال ەتەتىن مۇناي ونىمدەرىن بولشەك ساۋدادا وتكىزۋ باعالارىنا مەملەكەتتىك رەتتەۋ ءتارتىبىن ازىرلەيدى جانە بەكىتەدى»، - دەلىنگەن قاۋلى جوباسىندا.
قۇجاتقا قوسىمشا بەرىلگەن تۇسىندىرمەدە كورسەتىلگەندەي، مينيسترلىككە مۇنداي قوسىمشا قۇزىرەت بەرۋ ديزەل وتىنىنىڭ تاپشىلىعىن تەجەۋگە مۇمكىندىك بەرمەك.
«كۇتىلەتىن ناتيجە - باعالاردى مەملەكەتتىك رەتتەۋ بەلگىلەنگەن مۇناي ونىمدەرىن ستاتسيونارلىق اۆتوجانارماي قۇيۋ ستانسيالارى ءۇشىن كوتەرمە جانە بولشەك ساۋدادا وتكىزۋگە شەكتى باعالاردى بەلگىلەۋ جولىمەن ديزەل وتىنىنىڭ تاپشىلىعىن تەجەۋ. قاۋلى جوباسىن قابىلداۋ قازاقستان رەسپۋبليكاسىنىڭ قولدانىستاعى زاڭناماسىنا سايكەس كەلتىرۋگە مۇمكىندىك بەرەدى»، - دەپ كورسەتىلگەن تۇسىندىرمەدە.
ايتا كەتەيىك، اتالعان قاۋلى جوباسى 30- قاڭتارعا دەيىن اشىق تالقىلاۋدا بولادى.
