لاۋازىمدى تۇلعالارعا جەر زاڭناماسىن بۇزعانى ءۇشىن جاۋاپكەرشىلىك كۇشەيەدى
«حالىقتى جەكە اۋلاداعى جايىلىم جەرلەرىمەن قاناعاتتاندىرۋ ماقساتىندا 2022 -جىلى جەرگىلىكتى اتقارۋشى ورگاندار بىرنەشە شارا جۇرگىزدى، ىرگەلەس جاتقان بوس جەرلەردى ەلدى مەكەندەر جەرىنە قوسۋ ارقىلى شەكارالارى 421,2 مىڭ گەكتارعا كەڭەيتىلدى. بوس جاتقان جەرلەردەن 2,4 ميلليون گەكتار جەرگىلىكتى تۇرعىندارعا قايتا ءبولىندى، 22,7 مىڭ گەكتار اۋىل شارۋاشىلىعى القاپتارى جايىلىمعا اۋىستىرىلدى. 325,5 مىڭ گەكتار حالىقتىڭ جايىلىمدارعا قاجەتتىلىگىن قاناعاتتاندىرۋ ءۇشىن الىندى جانە 1,2 ميلليون گەكتار جەر رەزەرۆكە قويىلدى»، - دەدى ە. قاراشوكەيەۆ ۇكىمەتتىڭ بۇگىنگى وتىرىسىندا.
اۋىل شارۋاشىلىعى مينيسترلىگى جەردى پايدالانۋ مەن قورعاۋ جونىندەگى مەملەكەتتىك باقىلاۋدى جەتىلدىرۋ جۇمىستارىن جالعاستىرۋدا. ماسەلەن، مينيسترلىكتىڭ باستاماسىمەن جەردى پايدالانۋ مەن قورعاۋدى مەملەكەتتىك باقىلاۋ ماسەلەلەرى بويىنشا اكىمشىلىك قۇقىق بۇزۋشىلىق تۋرالى كودەكسكە وزگەرىستەر ەنگىزۋ جونىندەگى زاڭ جوباسى ازىرلەندى. ول ق ر پارلامەنتى ءماجىلىسىنىڭ قاراۋىندا جانە بيىلعى 18- قاڭتاردا ەكىنشى وقىلىمعا شىعارىلادى.
«زاڭ جوباسى ءبىرقاتار ەلەۋلى تۇزەتۋلەر ەنگىزۋدى كوزدەيدى: جەرگىلىكتى اتقارۋشى ورگانداردىڭ لاۋازىمدى ادامدارىنىڭ جەر زاڭناماسىن بۇزعانى ءۇشىن جاۋاپكەرشىلىگىن كۇشەيتۋ؛ مەنشىگىندە جايىلىمدىق جانە شابىندىق القاپتارى بار ادامنىڭ ەلدى مەكەن جەرلەرىندە زاڭسىز ءشوپ شابۋ جانە مال جايۋ ماسەلەسى بويىنشا جاۋاپكەرشىلىكتەرىن بەلگىلەۋ جانە باسقالارى. مينيسترلىك وسى تۇزەتۋلەردى جارتى جىلدا قابىلداۋ ءۇشىن بارىنشا كۇش سالۋدا»، - دەدى ە. قاراشوكەيەۆ.
ايتا كەتەيىك، قازاقستاننىڭ 15 وبلىسىندا مال جايۋ ءۇشىن 8,9 ميلليون گەكتار جەر جەتىسپەيدى. بۇل كوبىنەسە جەكە قوسالقى شارۋاشىلىقتاردا مال سانىنىڭ ايتارلىقتاي وسۋىنە بايلانىستى.
وتكەن جىلى پايدالانىلماي جاتقان 5,2 ميلليون گەكتار جەر مەملەكەتكە قايتارىلدى، 2023 -جىلدىڭ سوڭىنا دەيىن تاعى 5 ميلليون گەكتار جەرگە شارا قولدانىلادى.
سونداي- اق قازاقستاندا جەر پايدالانۋشىلاردىڭ نەمقۇرايلىعىنان 90 ميلليون گەكتار اۋماق ەروزياعا ۇشىرادى جانە ونىڭ 29,3 ميلليون گەكتارى ىسكە جارامسىز.
اۆتور
ايجان سەرىكجان قىزى
