قازاقستاندا كەدەيلەر سانى كوبەيدى - ەڭبەك ءمينيسترى

استانا. قازاقپارات - قازاقستاندا كەدەيلىك دەڭگەيى بىلتىرعا قاراعاندا كوتەرىلە تۇسكەن. اتالعان دەرەكتى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا كەلتىردى، دەپ حابارلايدى قازاقپارات ءتىلشىسى.

«بىلتىر ەلىمىزدە كەدەيلەر ۇلەسى %4,9 بولسا، بيىل %5,1- عا جەتتى. دەمەك، كەدەيلەر سانى ارتقان. جوعارى ينفلياتسيا ازاماتتاردىڭ تابىسىنا ايتارلىقتاي اسەر ەتتى. تاپقان تابىستىڭ دەنى (60-70 پايىزى) ازىق-تۇلىككە جۇمسالادى. ناتيجەسىندە وتباسىنى ودان ءارى دامىتۋعا قارجى جەتپەيدى. ارينە، كۇنكورىس دەڭگەيىنىڭ ازايا ءتۇسۋى ءار وتباسىعا اسەر ەتەدى»، - دەيدى تامارا دۇيسەنوۆا ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ودان ءارى مينيستر قانداستاردى قولداۋعا قاتىستى ويىن ورتاعا سالدى.

«الەمدە ەتنيكالىق يمميگراتسيامەن اينالىساتىن ءتورت ەل بار، سونىڭ ءبىرى - قازاقستان. بىزدەن بولەك، يزرايل، پولشا جانە گەرمانيا. ەتنيكالىق قانداستارعا ارنالعان جوبانى ازىرلەۋ بارىسىندا اتالعان ەلدەردىڭ تاجىريبەسى ەسكەرىلدى. وعان سايكەس وزگە ەلدەن كەلگەن قانداستاردى وتانىنا بەيىمدەۋ ماقساتىندا ءتۇرلى الەۋمەتتىك قولداۋ، كومەك كورسەتىلەدى، ياعني تۇرعىن ءۇي جانە ەڭبەكپەن قامتۋ دەگەن سەكىلدى. ءبىزدىڭ قانداستارىمىزعا ۇسىناتىن الەۋمەتتىك كومەگىمىز كوپ تە، از دا ەمەس. ولاردىڭ وتانىنا بەيىمدەلۋى ءۇشىن كورسەتىلەتىن العاشقى كومەك دەۋگە بولادى»، - دەيدى ۆەدومستۆو باسشىسى.