كوپبالالى انالار مەن قانداستاردىڭ مۇددەسىن قورعايتىن ۋاكىل ينستيتۋتى قۇرىلماق

استانا. قازاقپارات – ق ر پرەزيدەنتى جانىنان الەۋمەتتىك تۇرعىدا وسال سانالاتىن توپتىڭ قۇقىقتارىن قورعاۋمەن اينالىساتىن ۋاكىل ينستيتۋتى قۇرىلماقشى.

«اشىق ن ق ا» پورتالىندا مەملەكەت باسشىسىنىڭ جارلىق جوباسى جاريالاندى، دەپ حابارلايدى قازاقپارات ءتىلشىسى.

«جوبانى قابىلداۋدىڭ ماقساتى - ازاماتتاردىڭ قۇقىقتارى مەن زاڭدى مۇددەلەرىنىڭ كەپىلدىگىن قامتاماسىز ەتۋ، سونداي-اق ولاردىڭ بۇزىلعان قۇقىقتارى مەن بوستاندىقتارىن مەملەكەتتىك جانە قوعامدىق ينستيتۋتتارمەن بىرلەسىپ قالپىنا كەلتىرۋ ماقساتىندا ءوز قىزمەتىن ەرىكتى نەگىزدە جۇزەگە اسىراتىن حالىقتىڭ الەۋمەتتىك وسال ساناتتارىنىڭ قۇقىقتارى جونىندەگى ۋاكىل ينستيتۋتى ەنگىزۋ»، - دەپ جازىلعان تۇسىندىرمەدە.

جوبادا ۋاكىلگە قانداي فۋنكتسيا بەرىلەتىنى ايتىلعان.

«ۋاكىلدىڭ نەگىزگى ماقساتتارى وسى جارلىققا قوسىمشادا كورسەتىلگەن حالىقتىڭ الەۋمەتتىك جاعىنان وسال ساناتتارىنىڭ قۇقىقتارى مەن زاڭدى مۇددەلەرىنىڭ كەپىلدىكتەرىن قامتاماسىز ەتۋ، سونداي-اق مەملەكەتتىك جانە قوعامدىق ينستيتۋتتارىمەن ءوزارا ءىس-قيمىلدا ولاردىڭ قۇقىقتارى مەن بوستاندىقتارىن قالپىنا كەلتىرۋ بولىپ تابىلادى دەپ بەلگىلەنسىن»، - دەلىنگەن قۇجاتتا.

سونىمەن اتالعان ۋاكىل مىنا 10 ساناتتاعى ازاماتتاردىڭ قۇقىقتارى مەن زاڭدىق مۇددەلەرىن قوعايتىن بولادى:

1) ۇلى وتان سوعىسىنىڭ ارداگەرلەرى؛

2) جەڭىلدىكتەرى بويىنشا ۇلى وتان سوعىسىنىڭ ارداگەرلەرىنە تەڭەستىرىلگەن ارداگەرلەر؛

3) باسقا مەملەكەتتەردىڭ اۋماعىنداعى ۇرىس قيمىلدارىنىڭ ارداگەرلەرى؛

4) مۇگەدەكتىگى بار ادامدار؛

5) مۇگەدەكتىگى بار بالالارى بار نەمەسە ولاردى تاربيەلەپ وتىرعان وتباسىلار؛

6) اتاۋلى الەۋمەتتىك كومەك الۋشىلار؛

7) اسىراۋشىسىنان ايرىلۋ بويىنشا جاردەماقى الۋشىلار؛

8) جاسىنا قاراي زەينەت دەمالىسىنا شىققان زەينەتكەرلەر؛

9) قانداستار؛

10) «التىن القا»، «كۇمىس القا» القالارىمەن ناگرادتالعان نەمەسە بۇرىن «باتىر انا» اتاعىن العان، سونداي-اق I جانە II دارەجەلى «انا داڭقى» وردەندەرىمەن ناگرادتالعان كوپبالالى انالار، كوپبالالى وتباسىلار.