جوعارعى سوتتىڭ ءۇش سۋدياسى قىزمەتىنەن بوساتىلدى

استانا. قازاقپارات - بۇگىن سەناتتىڭ جالپى وتىرىسىندا جوعارعى سوتتىڭ ءۇش سۋدياسى قىزمەتىنەن بوساتىلدى، دەپ حابارلايدى قازاقپارات ءتىلشىسى.

جوعارى سوت كەڭەسىنىڭ ءتوراعاسى دەنيس شيپپ بۇل سۋديالار باسقا قىزمەتكە تاعايىندالۋىنا بايلانىستى جوعارعى سوت سۋدياسى قىزمەتىنەن بوساتىلۋى كەرەك ەكەنىن ايتتى.

وسى ورايدا پارلامەنت سەناتىنىڭ قاراۋىنا اسان ەسكەندىروۆتى، ايگۇل قىدىربايەۆانى، ۆياچەسلاۆ ساليدى جوعارعى سوت سۋدياسى قىزمەتىنەن بوساتۋ ۇسىنىمى ەنگىزىلدى.

پالاتا دەپۋتاتتارى اتالعان ۇسىنىمعا قولداۋ ءبىلدىردى.

بۇدان بۇرىن حابارلانعانداي، اسان ەسكەندىروۆ پەن ايگۇل قىدىربايەۆا كونستيتۋتسيالىق سوتتىڭ سۋديالارى قىزمەتىنە تاعايىندالدى.

سونىمەن قاتار، ۆياچەسلاۆ سالي قوستاناي وبلىستىق سوتىنىڭ ءتوراعاسى بولىپ تاعايىندالدى.

ەسكە سالساق، مەملەكەت باسشىسى قاسىم-جومارت توقايەۆتىڭ جارلىعىمەن ەلۆيرا ءابىلحاسىم قىزى ازيموۆا كونستيتۋتسيالىق سوتتىڭ ءتوراعاسى لاۋازىمىنا تاعايىندالعان ەدى.