تاياۋدا ءماجىلىس تاراتىلۋى مۇمكىن

استانا. قازاقپارات - ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتوراعاسى، دەپۋتات ارمان قوجاحمەتوۆ جاقىن ارادا پالاتانىڭ تاراتىلۋى مۇمكىندىگىنە قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«بۇل جايىندا پرەزيدەنت (جولداۋدا) ايتقان بولاتىن. ياعني، بيىلدىڭ ءبىرىنشى جارتىسىندا ءتيىستى شەشىم قابىلداناتىنى ءمالىم بولدى. اتاپ ايتقاندا، نورماتيۆتىك- قۇقىقتىق بازا دايىندالدى، سونداي-اق ءتيىستى زاڭدارعا سايلاۋعا قاتىستى تۇزەتۋلەر دە ەنگىزىلدى. سوندىقتان جاقىن ارادا ءتيىستى قادامدار جاسالۋى مۇمكىن»، - دەدى ا. قوجاحمەتوۆ ءماجىلىستىڭ جالپى وتىرىسىنان كەيىن تىلشىلەر سۇراعىنا جاۋاپ بەرە وتىرىپ.

وسى ورايدا تىلشىلەر دەپۋتاتتان ءماجىلىستىڭ جاڭا قۇرامىنا ەنۋى مۇمكىندىگىنە قاتىستى سۇرادى.

«AMANAT پارتياسىنىڭ مۇشەسى ەكەنىمدى بىلەسىزدەر جانە بۇل ماسەلەنى پارتيا شەشەدى. سوندىقتان پارتيا سەزىندە تىزىمگە ەنەتىن كانديداتتاردىڭ اتى-ءجونى ناقتىلانادى»، - دەدى ارمان قوجاحمەتوۆ.

جاقىندا بۇقارالىق اقپارات قۇرالدارىندا 16-قاڭتاردا پارلامەنت ءماجىلىسى تاراتىلۋى مۇمكىن ەكەنى حابارلانعان ەدى.

بۇدان بۇرىن حابارلانعانداي، 2022 -جىلى قىركۇيەكتەگى جولداۋىندا مەملەكەت باسشىسى قاسىم- جومارت توقايەۆ ءماجىلىستى سايلاۋعا قاتىستى ايتقان بولاتىن.

«سوندىقتان ءماجىلىستىڭ جانە بارلىق دەڭگەيدەگى ءماسليحاتتاردىڭ سايلاۋىن كەلەسى جىلدىڭ ءبىرىنشى جارتىسىندا وتكىزۋدى ۇسىنامىن. ءبىز كوپشىلىكتىڭ مۇددەسىن بىلدىرەتىن دەپۋتاتتاردىڭ جاڭا قۇرامىن جاساقتايمىز»، - دەدى پرەزيدەنت.