وقۋشىلارعا پيدجاك ورنىنا كارديگان كيۋگە رۇقسات ەتىلدى
اتاپ ايتساق، قازىرگى مەكتەپ فورماسى پيدجاك، جيلەت، شالبار، بەلدەمشە جانە جەيدەدەن تۇرادى. ەندىگىدە وقۋشىلارعا پيدجاك پەن جاكەتتى توقىلعان كۇرتەشە/كارديگانعا (تۇيمەلەرى نەمەسە سىدىرماسى بار)، كۇندەلىكتى كيەتىن جەيدەنى پولو جەيدەلەرگە اۋىستىرۋعا بولادى. الايدا كيىمنىڭ ءتۇسى، ءستيلى جانە باسقا دا تۇستارى مەكتەپ اكىمشىلىگىمەن كەلىسىلۋى كەرەك.
«جالپى مەكتەپ فورماسىنا قويىلاتىن تالاپتار وزگەرمەيدى. بۇل جەردە اڭگىمە ءتىزىمدى تولىقتىرۋ جانە تاڭداۋ مۇمكىندىگىن بەرۋ جايىندا بولىپ وتىر. بۇعان دەيىن اتا-انالار بۇل مۇمكىندىكتىڭ بالالار ءۇشىن ىڭعايلى ەكەنىن ايتىپ، قاراستىرۋدى سۇراعان بولاتىن. ويتكەنى ساباق كەزىندە رەسمي كوستيۋم كيۋ بالالاردىڭ بارلىعىنا بىردەي ىڭعايلى ەمەس. سول سەبەپتى بالاما رەتىندە ىڭعايىلىراق كيىممەن كەلۋگە رۇقسات بەرۋ ۇسىنىلدى. مىسالى، رەسمي پيدجاك نەمەسە جاكەت ورنىنا توقىلعان كۇرتە/كارديگان جانە كۇندەلىكتى جەيدە ورنىنا پولو جەيدە.
شەشىمدى مەكتەپ اكىمشىلىگى، قامقورشىلىق كەڭەسى جانە مەكتەپتىڭ ءوزىن-ءوزى باسقارۋ كەڭەسى قابىلدايدى. بۇل تولىقتىرۋلار كەلەسى جىلى مەكتەپتەردە شەشىم قابىلداۋعا جەتكىلىكتى ۋاقىت بولۋى ءۇشىن الدىن الا باستالىپ وتىر. ءبىراق بۇل مەكتەپتەر بەكىتىلگەن تالاپتاردى مىندەتتى تۇردە قايتا قاراۋى كەرەك دەگەندى بىلدىرمەيدى. بۇل قاجەت بولعان جاعدايدا پايدالانۋعا بولاتىن قوسىمشا مۇمكىندىك پەن نۇسقا عانا»، - دەپ ءتۇسىندىردى ق ر وقۋ-اعارتۋ مينيسترلىگى ورتا ءبىلىم كوميتەتىنىڭ ءتوراعاسى گۇلميرا رايىنبەك قىزى.
ءمالىم ەتىلگەندەي، اتا-انالار مەكتەپ فورماسىن تاڭداۋى تۇسكەن وندىرۋشىدەن ساتىپ الا الادى.
