ماكدونالدستىڭ جابىلۋى مەن قايرات بورانبايەۆ ءىسىنىڭ اراسىندا قانداي بايلانىس بار
بۇگىن ەلوردادا قايرات بورانبايەۆقا قاتىستى سوت وتىرىسى ءوتىپ جاتىر.
ونىڭ اياسىندا ب ا ق وكىلدەرى اسەت ماشانوۆتان McDonalds جەلىلەرى جۇمىسىن توقتاتۋىنىڭ بورانبايەۆتىڭ ۇستىنەن قوزعالعان قىلمىستىق ىسپەن بايلانىسىن سۇراعان ەدى.
«مەنىڭ بىلۋىمشە، ەكى وقيعانىڭ اراسىندا ەشقانداي بايلانىس جوق. ارينە، بۇل جايلى جاھاندىق McDonalds كورپوراتسياسىنان سۇراعان ءجون. ال جالپى بۇل ىسكە قاتىسى شامالى»، - دەپ جاۋاپ بەردى ول.
سونىمەن قاتار ول McDonalds-تىڭ قازاقستانعا ورالۋ مۇمكىندىگىنە قاتىستى دا پىكىر ءبىلدىردى.
«كوپتەگەن فاكتورعا بايلانىستى. بۇل ساۋالعا ناقتى جاۋاپ بەرە المايمىن. ويتكەنى، ونى جاھاندىق كورپوراتسيا شەشەدى. ورىن العان جايت قازىرگى گەوساياسي احۋالعا بايلانىستى. ول شەشىلگەننەن كەيىن جەتكىزىلىمنىڭ بۇرىنعى جۇيەسى قالپىنا كەلەر بولسا، وندا بۇل ماسەلە شەشىلىپ قالار»، - دەدى اسەت ماشانوۆ.
ەسكە سالا كەتەيىك، بۇعان دەيىن McDonald's جىلدام تاماقتانۋ جەلىسى قازاقستاننان ءبىرجولا كەتەتىنىن حابارلاعان ەدىك.
برەند قىزمەتىن توقتاتقانىمەن، مەيرامحانا باسقا اتاۋمەن جۇمىسىن قايتا باستايدى.
