وليگارحتاردى اۋىزدىقتاپ، شەتەلگە زاڭسىز كەتكەن كاپيتالدى قايتارۋ وتە ماڭىزدى - ەرلان سايروۆ
«وليگارحتارعا «ءاي دەيتىن اجە، قوي دەيتىن قوجا» بولمادى. «دۇنيەجۇزىلىك بانكتىڭ» ەسەبى بويىنشا، قازاقستان حالقىنىڭ %15 كەدەي ساناتىندا. ەسكى جۇيەنىڭ «الەۋمەتتىك ادىلەتسىزدىك» فاكتىلەرى، حالىقتى ساياساتتان شەكتەتۋ تەندەنتسياسى مەملەكەتتى، قوعامدى، جۇرتتى «قاسىرەتتى قاڭتارعا» يتەرمەلەدى، جاقىنداتتى. 2019-جىلى قازاقستاندا بيلىك اۋىستى. پرەزيدەنت قاسىم-جومارت توقايەۆ بيلىككە كەلگەن كۇنى «دەموكراتيا مەن پليۋراليزم بولماي، قازاقستاندا تۇراقتى ەكونوميكالىق دامۋدى قالىپتاستىرۋ مۇمكىن ەمەس» دەپ مالىمدەدى. وسى ورايدا ەۆوليۋتسيالىق تۇرپاتتاعى ساياسي رەفورمالار باستالدى. ۇلتتىق كەڭەس قۇرىلدى، جاڭا تۇرپاتتاعى «ميتينگىلەر» جونىندەگى زاڭ قابىلداندى»، - دەدى دەپۋتات ءماجىلىستىڭ جالپى وتىرىسىندا قاڭتار وقيعاسى تاقىرىبىن تالقىلاۋ كەزىندە
ونىڭ پايىمىنشا، ەلىمىزدەگى رەفورمالارعا قارسى توپتار قالىپتاستى.
«سونىمەن بىرگە، كوپتەگەن جىلدار بۇرىن جوسپارلى تۇردە كونستيتۋتسياعا جاسالعان الىمجەتتىلىك ناتيجەسىندە، زاماناۋي لوگيكاعا سايكەس كەلمەيتىن، قوسارلانعان ينستيتۋت قالىپتاسىپ، كۇشتىك قۇرىلىمدار ۇكىمەتتىڭ جۇمىسىنا ءجونسىز ارالاستى. سونىڭ ناتيجەسىندە قۇقىق قورعاۋ، ۇلتتىق قاۋىپسىزدىك ورگاندارىندا كونستيتۋتسياعا، رەفورمالارعا قارسى توپتار قالىپتاستى. وسى كەرتارتپا كۇشتەر ليگيتيمدى پرەزيدەنتكە قارسى «زاگوۆور» دايىندادى. «قاسىرەتتى قاڭتار» لەگيتيمدى پرەزيدەنت قاسىم-جومارت توقايەۆقا قارسى رەاكتسيونەر كۇشتەردىڭ «مەملەكەتتىك توڭكەرىس» ارەكەتى»، - دەدى ە. سايروۆ.
ونىڭ ايتۋىنشا، قاڭتاردا ازاماتتاردىڭ بەيبىت، ءادىل تالاپتارىن ريەۆانشيستەر ءوزىنىڭ ەلگە، حالىققا قارسى جامان پيعىلىنا پايدالانىپ كەتتى. رەاكتسيونەرلەردىڭ ەكسترەميستىك ارانداتۋ ءىس-ارەكەتتەرىنىڭ كەسىرىنەن جاپپاي تارتىپسىزدىككە جول بەرىلدى، مەملەكەتتىك ورگاندارعا قارۋلى شابۋىل جاسالدى، الماتى مەن باسقا دا قالالار قارا تۇنەككە باتتى.
«قاڭتار كەزىندە قاسىم-جومارت توقايەۆتىڭ باتىل، وتكىر ءىس-ارەكەتتەرىنىڭ ناتيجەسىندە قازاقستاننىڭ تەرريتوريالىق تۇتاستىعى مەن مىزعىماستىعى ساقتالدى. «قاسىرەتتى قاڭتار» ءتارىزدى تراگەديا قايتالانباۋى ءتيىس! نە ىستەۋ كەرەك؟ بىزگە زاڭ مەن ءتارتىپ قاجەت! ءبىزدىڭ قازاقستاننان باسقا وتانىمىز، قۇتتى مەكەنىمىز جوق! كۆازيمەملەكەتتىك سەكتور رەسۋرستارىن باقىلاۋدىڭ سەنىمدى تەتىكتەرىن جاساۋ، وليگارحتاردى اۋىزدىقتاۋ، شەتەلگە زاڭسىز كەتكەن كاپيتالدى قايتارۋدى تەزدەتۋ وتە ماڭىزدى»، - دەدى ەرلان سايروۆ.
«پرەزيدەنت توقايەۆتىڭ سايلاۋالدى باعدارلاماسىندا حالىقتى كەدەيلىكتىڭ «شىنجىرىنان» شىعارۋ جولدارى قاراستىرىلعان.
اۋىلداردا حالىققا ءۇي شارۋاشىلىقتارىن دامىتۋ ءۇشىن 1 ميلليون ادامدى قامتيتىن 1 تريلليون تەڭگە بولىنەدى، الداعى جەتى جىلدا 111 ميلليون شارشى مەتر ءۇي سالىنىپ، 3,3 ميلليون ادام جۇمىسپەن قامتىلۋى ءتيىس. بۇل ماسەلەنى ۇكىمەت ساپالى، جۇيەلى ورىنداۋى ءتيىس»، - دەدى دەپۋتات.
