پرەزيدەنت ۇلتتىق بانك ءتوراعاسىنا ءبىرقاتار تاپسىرما بەردى

پرەزيدەنتكە ۇلتتىق بانكتىڭ بيىلعى قاڭتار-قاراشا ايلارىنداعى اقشا-كرەديت ساياساتىنىڭ الدىن الا قورىتىندىلارى تۋرالى ەسەپ بەرىلدى.

قاسىم-جومارت توقايەۆقا سىرتقى جانە ىشكى نارىقتارداعى احۋال، ينفلياتسيانىڭ ءوسۋ قارقىنى مەن ونىڭ بولجامى، سونداي-اق التىن-ۆاليۋتا رەزەرۆتەرىنىڭ جاي-كۇيى جونىندە باياندالدى. كەزدەسۋ بارىسىندا ۇلتتىق بانكتىڭ قابىلداعان شارالارى تەڭگەلەي سالىنعان دەپوزيتتەردىڭ بۇرىن-سوڭدى بولماعان دەڭگەيگە دەيىن وسۋىنە، ۆاليۋتا نارىعىن تۇراقتاندىرۋعا جانە ەكونوميكانى كرەديتتەۋ ءوسىمىن جالعاستىرۋعا وڭ ىقپال ەتكەنى اتاپ ءوتىلدى.

پرەزيدەنتكە سيفرلىق تەڭگەنى ەنگىزۋ قاجەتتىگىنە قاتىستى جۇرگىزىلگەن زەرتتەۋ قورىتىندىلارى باياندالدى. عالىمجان ءپىرماتوۆتىڭ ايتۋىنشا، نارىق قاتىسۋشىلارى، ناقتى تۇتىنۋشىلار مەن ساۋدا-سەرۆيستىك كاسىپورىندارىنىڭ قاتىسۋىمەن وتكەن سيفرلىق تەڭگە پلاتفورماسىن تەستىلەۋ ءساتتى بولدى. سيفرلىق تەڭگەنىڭ ەنگىزىلۋى قولما-قول اقشاسىز تولەمنىڭ قولجەتىمدىلىگىن ارتتىرىپ، مەملەكەتتىك شىعىنداردىڭ اشىقتىعىن قامتاماسىز ەتەدى جانە يننوۆاتسيالىق قارجى ونىمدەرىن جاساۋعا مۇمكىندىك بەرەدى. ۇلتتىق بانك ءتوراعاسى سيفرلىق تەڭگە 2025-جىلدىڭ سوڭىنا دەيىن قولدانىسقا ەنگىزىلەتىنىن جەتكىزدى. سيفرلىق تەڭگەنى اينالىمعا ەنگىزۋ جوسپارى ءۇش كەزەڭنەن تۇرادى. مەملەكەت باسشىسى جوبانى ودان ءارى جۇزەگە اسىرۋ جونىندە مىندەت جۇكتەدى.

كەزدەسۋ سوڭىندا قاسىم-جومارت توقايەۆ اقشا-كرەديت ساياساتىن ءتيىمدى ىسكە اسىرۋعا باعىتتالعان ءبىرقاتار ناقتى تاپسىرما بەردى.