تاريحي وتانىن دامىتۋعا ۇلەس قوسقان قانداستارعا پرەزيدەنت سىيلىعى بەرىلۋى مۇمكىن

«شەتەلدە تۇراتىن ەتنيكالىق قازاقتاردىڭ الەۋەتى مەن مۇمكىندىكتەرىن پايدالانۋ كەرەك. وسى ماقساتتا امەريكالىق «گرين كاردقا» ۇقساس «اتا جولى» كارتاسىن ەنگىزۋ ۇسىنىلادى. بۇل قۇجات جوعارى دەڭگەيدەگى كاسىبي مامان نەمەسە ءوز ەلدەرىندە بيزنەس-كەيستەردى ءساتتى ىسكە اسىرعان ءارى ولاردى قازاقستاندا جۇزەگە اسىرۋعا ىقىلاس بىلدىرگەن ۇلتى قازاق ازاماتتارعا بەرىلەدى»، - دەدى ءىلياس يسپانوۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن بىرگە، ەڭبەك مينيسترلىگى تاريحي وتانىن دامىتۋعا قوسقان ۇلەسى ءۇشىن قانداستاردى جىل سايىنعى «پارىز» بايقاۋى اياسىندا پرەزيدەنت سىيلىعىمەن ماراپاتتاۋدى ۇسىندى.

«ەلگە كەلەتىن قانداستار كوشى-قونىن رەتتەۋ تەتىكتەرىن جەتىلدىرۋ كەرەك. ياعني، ەلىمىزدەگى دەموگرافيالىق جانە ەكونوميكالىق ۇردىستەردى ەسكەرە وتىرىپ، قۇجاتتاردى راسىمدەۋدىڭ العاشقى كەزەڭىندە قانداستاردى ەڭبەك كۇشى تاپشى وڭىرلەرگە قونىستانۋعا قوسىمشا قارجىلاي ىنتالاندىرۋ ۇسىنىلادى»، - دەدى كوميتەت وكىلى.

مينيسترلىك مالىمەتىنە سايكەس، 1991-جىلدان باستاپ قازاقستانعا 1 ميلليون 105,7 مىڭ ەتنيكالىق قازاقتار كەلگەن.

2022-جىلعى 1- جەلتوقسانداعى جاعداي بويىنشا تاريحي وتانىنا كەلىپ قانداس مارتەبەسىن العان 17888 قازاق بار.

جىل باسىنان باستاپ قازاقستانعا كەلگەن قانداستاردىڭ جارتىسىنان كوبى (63,5 پايىز) وزبەكستاننان بولسا، ق ح ر- دان 8,6 پايىز، تۇركىمەنستاننان 9,1 پايىز، موڭعوليادان 4,9 پايىز، رەسەيدەن 9,9 پايىز جانە باسقا دا ەلدەردەن 4 پايىز قانداس بار.

بيىلعى 1- جەلتوقسان بويىنشا جۇمىسقا جارامدى ەتنيكالىق قازاقتار ۇلەسى 59,4 پايىز، جۇمىسقا جارامدى جاستان كىشىلەرى - 26,9 پايىز جانە زەينەتكەرلەر - 13,7 پايىز قۇرادى.