پرەزيدەنت: «ءاربىر ازامات - ۇلتتىق بايلىقتىڭ يەسى» دەگەن ءسوز جاي ۇران ەمەس

بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەزيدەنتى ايتتى، دەپ حابارلايدى قازاقپارات اقوردانىڭ باسپا ءسوز قىزمەتىنىڭ تەلەگرامداعى بورت№1 ارناسىنا سىلتەمە جاساپ.

«كەلەسى ماسەلە - بيۋدجەت ساياساتى. ۇكىمەت بيۋدجەتتىڭ تۇراقتى بولۋىن قامتاماسىز ەتۋى كەرەك. ۇلتتىق قوردىڭ ترانسفەرتىنە تاۋەلدىلىكتەن بىرتىندەپ قۇتىلۋىمىز قاجەت. ءبىر جىلدان كەيىن ۇلتتىق قوردىڭ ينۆەستيتسيالىق تابىسىنىڭ جارتىسىن بالالاردىڭ ەسەپشوتىنا اۋدارا باستايمىز. سول كەزدە بارشا ازاماتتار ۇلتتىق قورداعى احۋالدى ءجىتى قاداعالاپ وتىراتىن بولادى.

«ءاربىر ازامات - ۇلتتىق بايلىقتىڭ يەسى» دەگەن ءسوز جاي ۇران ەمەس. بۇل ناعىز حالىقتىق، قوعامدىق باقىلاۋدىڭ باستالعانىن بىلدىرەدى. ۇكىمەت تە، ۇلتتىق بانك تە مۇنى جەتە ءتۇسىنۋى كەرەك. تاعى دا ەستەرىڭىزگە سالامىن، الداعى 7 جىلدا ۇلتتىق قوردىڭ اكتيۆتەرى 100 ميلليارد دوللارعا جەتۋگە ءتيىس. سوندىقتان اقشانى ازىراق جۇمساپ، كوبىرەك تابىس تابۋ كەرەك. قازىر بۇل ماسەلەدە ولقىلىقتار بار.

ۇلتتىق قوردىڭ ينۆەستيتسيالىق كىرىسى وزگە ەلدەردىڭ مۇنداي قورلارىمەن سالىستىرعاندا الدەقايدا تومەن. ۇلتتىق قوردىڭ جىلدىق تابىسى سوڭعى 10 جىلدا 1,6 پايىز بولدى. سينگاپۋرداعى وسىنداي قور 6,4 ال نورۆەگيانىڭ قورى 7,5 پايىز تابىس تاپقان. دەمەك، بىزدەگى قوردى باسقارۋ مىندەتىن اتقاراتىن ورگاننىڭ جۇمىسى ايتارلىقتاي ءتيىمدى دەپ ايتۋعا بولمايدى.

ۇلتتىق بانككە ۇكىمەتپەن بىرلەسىپ، ۇلتتىق قوردى باسقارۋ ءىسىن جەتىلدىرۋ تۋرالى ۇسىنىس ەنگىزۋدى تاپسىرامىن. وندا مەن ايتىپ وتكەن كەمشىلىكتەر تۇگەل ەسكەرىلۋگە ءتيىس»، - دەدى مەملەكەت باسشىسى.

ەلىمىزدە ءادىل باسەكە ورناپ، بيزنەس ادال جۇمىس ىستەسە، ادىلەتتى نارىقتىق ەكونوميكا قۇرىلادى.

«ءۇشىنشى. ءادىل جانە ءتيىمدى ەكونوميكالىق ساياسات جۇرگىزىلۋى كەرەك. ەلىمىزدە ءادىل باسەكە ورناپ، بيزنەس ادال جۇمىس ىستەسە، ادىلەتتى نارىقتىق ەكونوميكا قۇرىلادى. ەڭ الدىمەن، وتاندىق كاسىپكەرلەردىڭ سەنىمىن ارتتىرۋ وتە ماڭىزدى. ەكونوميكانى مونوپوليادان ارىلتۋ ءۇشىن مەكەمەارالىق كوميسسيا قۇرىلدى. بۇل كوميسسيا قاجەتتى جۇمىستى ءتيىمدى جۇرگىزىپ جاتىر.

قازىر جەكە مەنشىككە زاڭسىز ءوتىپ كەتكەن اكتيۆتەردى قايتارۋعا باسا ءمان بەرىلىپ وتىر. ءبىراق كەيبىر ماسەلەلەر نازاردان تىس قالىپ بارادى. ەكونوميكاعا مەملەكەتتىڭ قاتىسۋىن ازايتۋ، مونوپوليستەردى وزىنە جاناما قاتىسى بار نارىقتىڭ قىزمەتىنە ارالاستىرماۋ - وتە ماڭىزدى جۇمىس. اكىمشىلىك كەدەرگىلەردى ازايتىپ، نارىققا باعا بەلگىلەۋ ارقىلى قىسىم جاساۋدى توقتاتۋ كەرەك»، - دەدى پرەزيدەنت.

فوتو: t.me/bort_01