مەملەكەت باسشىسى جوعارى ەۋرازيالىق ەكونوميكالىق كەڭەستىڭ وتىرىستارىنا قاتىسۋدا
بىشكەك. قازاقپارات - قىرعىز رەسپۋبليكاسىنىڭ پرەزيدەنتى سادىر جاپاروۆ قازاقستان پرەزيدەنتىن «الا- ارچا» رەزيدەنتسياسىنىڭ كونگرەسس- حوللىندا قارسى الدى.
وندا جوعارى ەۋرازيالىق ەكونوميكالىق كەڭەستىڭ شاعىن جانە كەڭەيتىلگەن قۇرامداعى وتىرىستارى ءوتىپ جاتىر، دەپ حابارلايدى قازاقپارات.
قىرعىز رەسپۋبليكاسىنىڭ پرەزيدەنتى سادىر جاپاروۆ جوعارى ەۋرازيالىق ەكونوميكالىق كەڭەستىڭ بىشكەكتەگى وتىرىسىن اشا وتىرىپ، قازاقستان پرەزيدەنتىن سايلاۋداعى جەڭىسىمەن قۇتتىقتادى.
«وسى ءساتتى پايدالانىپ، قۇرمەتتى قاسىم- جومارت كەمەل ۇلىن تاعى دا قازاقستان رەسپۋبليكاسىنىڭ پرەزيدەنتتىگىنە كىرىسكەنىمەن قۇتتىقتاعىم كەلەدى. قازاقستان رەسپۋبليكاسى پرەزيدەنتىنىڭ سايلاۋى قازاقستان حالقىنىڭ تولىق سەنىمى مەن قولداۋىن پاش ەتتى. ءسىزدىڭ دانا باسشىلىعىڭىزبەن ءبارىمىز ءۇشىن باۋىرلاس قازاقستان دامۋ مەن گۇلدەنۋ جولىنداعى سەنىمدى قادامىن جالعاستىرا بەرەتىنىنەن كوزىم جەتەدى»، - دەدى قىرعىز باسشىسى.
ايتا كەتەيىك، مەملەكەت باسشىسى جوعارى ەۋرازيالىق ەكونوميكالىق كەڭەستىڭ وتىرىسىنا قاتىسۋ ءۇشىن بىشكەككە باردى. وداققا مۇشە ەلدەردىڭ باسشىلارى قازىر شاعىن قۇراممەن وتىرىس وتكىزىپ جاتىر.
اۆتور
ەسىمجان ناقتىباي
