سايلاۋدا مەملەكەتتىك قۇرىلىمنىڭ جاڭا مودەلى ىسكە قوسىلادى - ەرلان قارين
بۇل پىكىردى قازاقستان رەسپۋبليكاسىنىڭ مەملەكەتتىك حاتشىسى ەرلان قارين ءبىلدىردى، دەپ حابارلايدى قازاقپارات.
«بۇگىن سايلاۋالدى ۇگىت-ناسيحات كەزەڭى اياقتالادى. جالپى، پرەزيدەنتتىك سايلاۋ جاريالانعان ساتتەن بەرى سايلاۋ ناۋقانى شامامەن ءۇش ايعا سوزىلدى. بۇل سايلاۋ ەلدىڭ ودان ءارى دامۋ جولدارى تۋرالى جاڭا مازمۇندى قوعامدىق پىكىرتالاستارعا سەرپىن بەردى. ءبىراق سايلاۋ ناۋقانىنان بولەك، الداعى سايلاۋدىڭ اسا ماڭىزدى مىندەتىن دە ۇمىتپاۋ كەرەك. وسى جەكسەنبىدە ناقتى ءبىر كانديداتقا داۋىس بەرۋ عانا جۇرمەيدى، قازاقستاندىقتار ماۋسىم رەفەرەندۋمىندا كونستيتۋتسيالىق كونتۋرلارىن بەكىتكەن مەملەكەتتىك قۇرىلىمنىڭ جاڭا، اناعۇرلىم دەموكراتيالىق مودەلى ىسكە قوسىلادى»، - دەپ جازدى ەرلان قارين ءوزىنىڭ Telegram پاراقشاسىندا.
كونستيتۋتسيالىق رەفورمانى زاڭنامالىق قامتۋ ماقساتىندا قابىلدانعان زاڭداردىڭ دا بۇگىن كۇشىنە ەنۋى سيمۆولدىق تۇرعىدا ماڭىزدى.
«مەملەكەتتىك ينستيتۋتتاردى قايتا جاڭعىرتۋدىڭ كەلەسى كەزەڭى - 2023-جىلدىڭ ءبىرىنشى جارتىسىندا پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىنىڭ الداعى سايلاۋى بولادى. ناتيجەسىندە جاڭا، تۇبەگەيلى باسقا ساياسي جۇيە قالىپتاسادى. وسىلايشا، 2019-جىلدان باستاپ بۇگىنگى كۇنگە دەيىن ەلىمىزدە جۇرگىزىلىپ جاتقان بارلىق ساياسي رەفورمالار ساياسي جاڭعىرۋدىڭ ءبىرىڭعاي پلاتفورماسىنا جيناقتالادى»، - دەيدى ە. قارين.
