قارجى ءمينيسترى پاتەردى جالعا الاتىندار ءوز قۇقىقتارىن قالاي قورعاۋ كەرەكتىگىن ايتتى
بۇل تۋرالى ۇكىمەت وتىرىسىنان كەيىن پرەمەر-ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«پاتەردى جالعا الۋ ءراسىمى زاڭدا كورسەتىلگەن تالاپپەن جۇزەگە اسسا، جالعا بەرەتىندەر پاتەردى جالعا الىپ وتىرعان تۇرعىنداردى سەبەپسىز قۋىپ جىبەرە المايدى. كوپ جاعدايدا تۇرعىندار اۋىزشا كەلىسىم ارقىلى پاتەردى جالعا الادى. بۇل تۇرعىدا كەيىن زاڭمەن دالەلدەۋ مۇمكىن ەمەس»، - دەدى ە. جامۋبايەۆ.
وسى ورايدا مينيستر پاتەردى جالعا الاتىندار ءوز قۇقىقتارىن قورعاۋى ءۇشىن مىندەتتى تۇردە زاڭنامادا كورسەتىلگەن تالاپپەن كەلىسىمشارتقا وتىرۋى كەرەك ەكەنىن ايتتى.
«بىرنەشە ايعا كەلىسىمشارت بەكىتسە، وندا پاتەر يەسى جالداۋ قۇنىن كەز كەلگەن ۋاقىتتا كوتەرە سالمايدى. زاڭعا، سوتقا جۇگىنۋگە بولادى. سونىمەن قاتار پاتەرىن جالعا بەرىپ وتىرعان ادام ءوزىنىڭ تابىسى اياسىندا سالىق تولەۋى ءتيىس. اتالعان شارت بولماسا، مەملەكەتتىك كىرىستەر كوميتەتى بىردەن تەكسەرە المايدى، زاڭسىزدىقتى انىقتاۋى قيىن بولادى. سوندىقتان بارلىق ءراسىم زاڭ بويىنشا جۇرگىزىلسە، ادامداردىڭ قۇقىعىن قورعاۋعا كومەكتەسەمىز. پاتەر يەلەرى زاڭسىز ارەكەتتەرگە جول بەرسە، تۇرعىندار سوتقا جۇگىنە الادى»، - دەدى ۆەدومستۆو باسشىسى.
سونىمەن قاتار مينيسترگە جالعا الىناتىن پاتەرلەردىڭ باعاسىن ءتۇسىرۋ مۇمكىندىگىنە قاتىستى سۇراق قويىلدى.
«بۇل پاتەردى جالعا بەرەتىن ادامداردىڭ پوزيتسياسىنا بايلانىستى. رەتتەي المايمىز، ەگەر قۇقىقبۇزۋشىلىق دەرەكتەرى كەزدەسسە، سالىق تولەمەسە، مەملەكەتتىك كىرىستەر كوميتەتى پاتەر يەلەرىن تەكسەرە الادى. سول جاعىنان كومەك كورسەتە الامىز»، - دەدى ە. جاماۋبايەۆ.
