زاڭگەر رەسەيلىكتەردىڭ قازاقستانعا اعىلۋىن شەكتەۋدىڭ قۇقىقتىق مۇمكىندىكتەرى تۋرالى ايتتى

استانا. قازاقپارات - بەلگىلى زاڭگەر، ەۋروپالىق قۇقىق جانە ادام قۇقىقتارى ساراپشىلىق ينستيتۋتىنىڭ ديرەكتورى مارات ءباشىموۆ رەسەيلىكتەردىڭ قازاقستانعا اعىلۋىن شەكتەۋدىڭ قۇقىقتىق مۇمكىندىكتەرى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«ماسەلەنى قۇقىقتىق تۇرعىدان ايتىپ كورەيىك:

1. جۋرناليستەر رەسەيلىكتەردىڭ شەكارادان كوپتەپ ءوتىپ جاتقانىن ايتىپ، ءتۇرلى سۇراقتار قويىپ جاتىر. ءبىزدىڭ زاڭناما بويىنشا، حالىقارالىق كەلىسىمشارتتار اياسىندا رەسەي فەدەراتسياسىنىڭ ازاماتتارى ەلىمىزدىڭ اۋماعىندا 90 كۇن جۇرە الادى. ودان كەيىن شىعىپ كەتۋى كەرەك.

2. ال ۋاقىتشا ءومىر سۇرۋگە زاڭناما بويىنشا التى بەكىتىلگەن ەرەجە بويىنشا راسىمدەلەدى. ولاردىڭ ىشىندە مەملەكەتتىك ورگانداردىڭ رۇقسات بەرۋ، راستاۋ قۇجاتتارى دا بار»، - دەپ جازدى ول Facebook-تەگى پاراقشاسىندا.

زاڭگەردىڭ پايىمىنشا، شەكارانى جابۋدىڭ باسقا جاعىمسىز جاعى بار جانە قارىمتا رەاكسيا تۋدىرۋى مۇمكىن.

«بۇل ەكونوميكالىق الىس-بەرىستى ناشارلاتىپ، قازاقستاننىڭ سولتۇستىگىندەگى وڭىرلەردىڭ ازىق- تۇلىك قاۋىپسىزدىگىنە سوققى بولىپ ءتيۋى ىقتيمال. ويتكەنى ازىق-تۇلىكپەن تاۋار يمپورتىنا تاۋەلدىلىك وتە جوعارى جانە بۇكىل شەكارالىق ساۋدانى قۇلدىراتىپ، تاۋارلاردىڭ تاپشىلىعى مەن قىمباتشىلىعىن تۋىنداتۋى مۇمكىن. بۇل كوزگە بىردەن انىق كورىنىپ تۇر»، - دەپ جازدى مارات ءباشىموۆ.