ا ە س سالىنسا بالقاش سۋى ازايا ما - كوميتەت جاۋابى
«بالقاش كولى ارالدىڭ تاعدىرىن قايتالاۋى مۇمكىن. كول سۋىندا تۇز بەن كۇكىرت ديوكسيدىنىڭ، اۋىر مەتال مەن ۋلى شاڭنىڭ جوعارى كونتسەنتراتسياسى بايقالىپ وتىر. سوعان قاراماستان ا ە س سالىنۋ ىقتيمال ورىن رەتىندە بالقاشتىڭ اۋماعى قاراستىرىلىپ وتىر. ول يدەيانىڭ اۆتورلارى سىزدەرمەن ساراپشى رەتىندە اقىلداستى ما؟» - دەپ سۇرادى ب ا ق وكىلى ورتالىق كوممۋنيكاتسيالار قىزمەتىندە وتكەن بريفينگىدە
مينيسترلىك وكىلىنىڭ ايتۋىنشا، تۇبەگەيلى شەشىم ءالى قابىلدانباعان.
«قازىرگى تاڭدا ەنەرگەتيكا مينيسترلىگىنىڭ جانىنداعى ۇلكەن ۇيىم زەرتتەۋ جۇرگىزىپ جاتىر. بالقاشتىڭ جاعاسىندا سالۋ تۋرالى شەشىم دە ءبىر نۇسقا رەتىندە زەرتتەلىپ جاتىر. بۇل ماسەلەدە ءۇش نەگىزگى فاكتور بار. ءبىرىنشىسى - ەكولوگيا ماسەلەسى. ا ە س بۇكىل ەكولوگيالىق تالاپتارعا سايكەس بولسا عانا سالىنادى. ەكىنشىسى - قوعامدىق تىڭداۋ. قوعام ماقۇلداسا عانا جوبا قولعا الىنادى. ءۇشىنشىسى - سۋدى ۇنەمدەۋ ماسەلەسى. بىزگە ماماندار اتوم ونەركاسىبىندە سۋدى بارىنشا از تۇتىناتىن تەحنولوگيالار بار ەكەنىن ايتتى. ياعني، تۇتىنىلۋى ىقتيمال سۋدىڭ كولەمى ەكوجۇيەگە، بالقاشتىڭ سۋ قورىنا كەرى اسەر ەتەتىندەي مولشەردە بولمايدى دەگەندى ايتىپ وتىر. بۇل ازىرگە كەلەشەكتىڭ ەنشىسىندەگى ماسەلە، تالقىلانىپ قانا جاتىر. جوبالاۋ كەزىندە مىندەتتى تۇردە سۋ كوميتەتى قارايدى. مەن اتاعان ءۇش ماسەلە ەڭ نەگىزگى قۇرامداس بولىگى بولادى»، - دەدى زۇلفۇحار جولداسوۆ.
سونداي-اق بالقاش سۋىنىڭ ازايىپ بارا جاتقانى تۋرالى اڭگىمەگە دە پىكىر ءبىلدىردى.
«بىزدەگى دەرەكتەر بويىنشا بۇگىندە بالقاشتىڭ دەڭگەيى ءتۇسىپ كەتكەنىن كورىپ وتىرعان جوقپىز. ءبىراق كەزەڭ-كەزەڭمەن بايقالاتىن تەندەنتسيا بار. بۇل جەردە ەكى ۇلكەن پروبلەما بار. ونىڭ ءبىرى - كليماتتىڭ وزگەرۋى، بالقاشقا قۇياتىن سۋ كوزدەرىنىڭ، ترانسشەكارالىق وزەندەر سۋىنىڭ ازايۋى، مۇزدىقتاردىڭ ەرۋى. بالقاشقا قۇياتىن سۋدىڭ 70 پايىزى ىلەدەن كەلەدى. ال ول وزەن باستاۋى قىتايدان باستاۋ الىپ جاتىر. سايكەسىنشە، كورشى ەلدەن اعىپ كەلەتىن سۋدىڭ ازايۋى پروبلەماسى دا بار. ول بويىنشا ترانسشەكارالىق وزەندەرگە بايلانىستى كەلىسسوز ءجۇرىپ جاتىر»، - دەدى كوميتەت باسشىسى.
