جاستار قازاقستاننىڭ كەز كەلگەن وڭىرىنەن جۇمىس تابا الادى - ەڭبەك ءمينيسترى

نۇر- سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا سولتۇستىك قازاقستان وبلىسىنا ساپارى بارىسىندا بەلسەندى جاستارمەن، ەرىكتىلەرمەن، جاستار رەسۋرستىق ورتالىقتارى جانە ۇكىمەتتىك ەمەس ۇيىم وكىلدەرىمەن كەزدەستى، دەپ حابارلايدى قازاقپارات.

مينيسترلىكتىڭ باسپا ءسوز قىزمەتى تاراتقان اقپاراتقا قاراعاندا، مينيستر مەملەكەت باسشىسىنىڭ تاپسىرماسى بويىنشا جاس مامانداردى جۇمىسپەن قامتۋ جانە وزگە دە قولداۋ شارالارى جونىندە ايتىپ بەردى.

تامارا دۇيسەنوۆا ءوز سوزىندە مەملەكەت باسشىسىنىڭ تاپسىرمالارىن ىسكە اسىرۋ اياسىندا جاستاردى ناتيجەلى جۇمىسپەن قامتۋعا باعىتتالعان كەشەندى شارالار جۇزەگە اسىرىلىپ جاتقانىن اتاپ ءوتتى.

«ۇلتتىق جوبالار مەن بيزنەستىڭ جەكە باستامالارى شەڭبەرىندە قۇرىلاتىن بارلىق جۇمىس ورىندارى ەلەكتروندىق ەڭبەك بيرجاسىندا ورنالاستىرىلادى. بۇل پلاتفورما بوس جۇمىس ورىندارىن ىزدەۋدىڭ دە، قىزمەتكەرلەردى ىزدەۋدىڭ دە ءبىرىڭعاي الاڭىنا اينالادى. قازىر ەلەكتروندىق ەڭبەك بيرجاسىندا جۇمىس بەرۋشىلەردەن 122 مىڭعا جۋىق بوس جۇمىس ورنى ۇسىنىلدى، 151 مىڭ جاس جۇمىس ىزدەپ ءوز تۇيىندەمەلەرىن ورنالاستىردى»، - دەپ حابارلادى تامارا دۇيسەنوۆا.

مينيستر جاستاردى ءىرى وندىرىستىك كاسىپورىندارعا جۇمىسقا ورنالاستىرۋ جوباسى جۇمىسپەن قامتۋعا باعىتتالعان تاعى ءبىر ماڭىزدى شارا ەكەنىن ايتتى. وعان ءبىرىنشى بولىپ ERG كومپانيالار توبى قوسىلدى، ول ەلەكتروندىق ەڭبەك بيرجاسىندا بوس ورىندار ءتىزىمىن ۇسىندى. وسىلايشا، 200-دەن استام جاس مامان جۇمىسقا ورنالاستىرىلدى. جاقىن بولاشاقتا باسقا كومپانيالاردان بوس جۇمىس ورىندارى قولجەتىمدى بولادى.

«وتكەن ايدا ەلەكتروندىق ەڭبەك بيرجاسىندا ءبىز قازاقستانداعى العاشقى ونلاين ەڭبەك جارمەڭكەسىن وتكىزدىك. ءىس- شارا 35 جاسقا دەيىنگى جاستاردى جۇمىسقا ورنالاستىرۋعا باعىتتالدى. جارمەڭكەگە 23 ءىرى كومپانيا، بانكتەر مەن ساۋدا جەلىلەرى قاتىسىپ، 1330 بوس جۇمىس ورنىن ۇسىندى. 3,5 مىڭ تۇيىندەمە كەلىپ ءتۇستى، جۇمىس بەرۋشىلەر قازىرگى ۋاقىتتا تاڭدالعان كانديداتتارعا ودان ءارى باعالاۋ جۇرگىزۋدە. مۇنداي جارمەڭكەلەر تۇراقتى نەگىزدە وتكىزىلەدى»، - دەدى تامارا دۇيسەنوۆا.

مينيستر ەلەكتروندىق ەڭبەك بيرجاسى ارقىلى جۇمىس تاۋىپ قانا قويماي، تاڭدالعان باعىت بويىنشا ونلاين كۋرستاردان ءوتىپ، جاڭا كاسىبي داعدىلارعا ۇيرەنۋگە بولاتىنىن اتاپ ءوتتى.

«سىزدەر جاستار اراسىندا سۇرانىسقا يە داعدىلار بويىنشا كۋرستاردىڭ اۆتورى بولا الاسىزدار. ولاردى ەلەكتروندىق ەڭبەك بيرجاسىندا تەگىن ورنالاستىرا الاسىز، ال بولاشاقتا اقىلى نەگىزدە ەڭ تانىمال كۋرستار بويىنشا وقۋدى جالعاستىرا وتىرىپ، ودان اقشا تابا الاسىز»، - دەپ تولىقتىردى تامارا دۇيسەنوۆا.

مينيستر سونداي- اق جاستاردى ىسكە اسىرىلىپ جاتقان ۇلتتىق جوبالار شەڭبەرىندە جۇمىسقا ورنالاسۋعا بەلسەندى قاتىسۋعا شاقىردى. سونىمەن قاتار، ول جاستاردىڭ قازاقستاننىڭ كەز كەلگەن وڭىرىنەن جۇمىس تابا الاتىنىن اتاپ ءوتتى.

ءسوزىنىڭ سوڭىندا تامارا دۇيسەنوۆا ەڭبەك نارىعىندا ەڭ ۇلكەن قيىندىقتارعا تاپ بولعان جاستار جۇمىس ورىندارىن سۋبسيديالاۋ بويىنشا جوو مەن كوللەدج تۇلەكتەرىنە ارنالعان جاستار پراكتيكاسى، ءبىلىمى مەن جۇمىس تاجىريبەسى جوق جاستارعا ارنالعان «العاشقى جۇمىس ورنى» جوبالارىنا قاتىسا الاتىنىن اتاپ ءوتتى.

رەداكتور

ايدار وسپاناليەۆ