قازاقستاندىقتار اندورراعا ۆيزاسىز ساپارلاي الادى

نۇر- سۇلتان. قازاقپارات - بۇگىن ق ر پرەمەر- ءمينيستىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى اندوررا سىرتقى ىستەر ءمينيسترى ماريا ۋباحپەن كەزدەستى.

كەزدەسۋ قورىتىندىسىندا پاسپورتتىڭ بارلىق ءتۇرى ءۇشىن ۆيزالىق تالاپتاردان ءوزارا بوساتۋ تۋرالى كەلىسىمگە قول قويىلدى، دەپ حابارلايدى قازاقپارات ءتىلشىسى.

«ەلورداعا كەلگەنگە دەيىن اندوررا سىرتقى ىستەر ءمينيسترى الماتى قالاسىنا بارىپ، ءبىرقاتار كەزدەسۋ وتكىزدى. ونىڭ ىشىندە قالانىڭ اكىمىمەن دە كەلىسسوز جۇرگىزدى. قازاقستان مەن اندوررانىڭ ەكىجاقتى بايلانىستارى تۇراقتى، ۇدەمەلى سيپاتقا يە، سىندارلى جانە ءوزارا ءتيىمدى ىنتىماقتاستىقتى دامىتۋعا باعىتتالعان. ەڭ وزىق جانە پەرسپەكتيۆالى باعىت - تۋريستىك سەكتور. وسىعان بايلانىستى بۇگىنگى كەلىسسوزدەردىڭ قورىتىندىسى بويىنشا ءبىز پاسپورتتىڭ بارلىق ءتۇرى ءۇشىن ۆيزالىق تالاپتاردان ءوزارا بوساتۋ تۋرالى كەلىسىمگە قول قويدىق. ول ءبىزدىڭ ەلدەرىمىز اراسىنداعى ءبىرىنشى ۇكىمەتارالىق كەلىسىم بولدى»، - دەپ اتاپ ءوتتى مۇحتار تىلەۋبەردى كەزدەسۋدەن كەيىن ب ا ق وكىلدەرىنە ارنالعان بريفينگ بارىسىندا.

سونىمەن قاتار ول قازاقستان مەن اندوررا اراسىنداعى شارت- قۇقىقتىق بازا ەكى ەل حالىقتارىنىڭ مۇددەسى ءۇشىن ودان ءارى دە تولىقتىرىلاتىن بولادى دەپ ۇمىتتەنەتىنىن جەتكىزدى.

«ەكى ەل حالىقارالىق قۇرىلىمداردا ءبىر- بىرىنە ءوزارا قولداۋ كورسەتەدى. قازاقستان مەن اندوررانىڭ ب ۇ ۇ جانە ە ق ى ۇ اياسىنداعى ىنتىماقتاستىعى جەمىستى دامىپ كەلەدى. ەۋروپا كەڭەسى پارلامەنتتىك اسسامبلەياسى مەن ە ق ى ۇ پارلامەنتتىك اسسامبلەياسى الاڭدارىندا پارلامەنتارالىق بايلانىستار دامۋدا. سونىمەن قاتار ءبىز اندورراعا قازاقستان رەسپۋبليكاسىنىڭ 2022-2024 -جىلدارعا ارنالعان ب ۇ ۇ ادام قۇقىقتارى جونىندەگى كەڭەسىنە كانديداتۋراسىن قولداعانى ءۇشىن العىسىمىزدى بىلدىرەمىز»، - دەدى ۇكىمەت باسشىسىنىڭ ورىنباسارى.

«بۇل كۇن ەكىجاقتى قارىم- قاتىناسىمىزدىڭ ايرىقشا ماڭىزعا يە مەجەسىنە اينالادى. 2008 -جىلدىڭ 30- قاڭتارىندا ەكى ەلدىڭ اراسىندا ديپلوماتيالىق بايلانىس ورناعان بولاتىن. كەلەسى جىل ءبىز ەلدەرىمىز اراسىنداعى ەكىجاقتى قارىم- قاتىناستىڭ 15 جىلدىعىن اتاپ وتەمىز»، - دەدى اندوررا ءمينيسترى ق ر پرەمەر- ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردىمەن كەزدەسۋدەن كەيىن ب ا ق وكىلدەرىنە ارنالعان بريفينگ بارىسىندا.

ماريا ۋباح قازاقستانعا ساپارى ەكىجاقتى ىنتىماقتاستىقتى نىعايتۋعا تىڭ سەرپىن بەرەتىنىن باسا ايتتى. سونىمەن قاتار ول بۇگىن قول قويىلعان ۆيزالىق تالاپتاردان ءوزارا بوساتۋ تۋرالى كەلىسىمنىڭ ارقاسىندا ەكىجاقتى بايلانىس ارتا تۇسەرىنە سەنىم ءبىلدىردى.

«وسى كەلىسىمنىڭ ارقاسىندا تۋريزم مەن بيزنەس ەسەبىنەن ەكىجاقتى قارىم- قاتىناس ارتا تۇسەتىنىنە سەنىم بىلدىرەمىز. مۇنان بولەك، تۋريزم بولاشاعىن، بارىنشا تۇراقتى تۋريستىك مودەل قالىپتاستىرۋ ماقساتىندا تاجىريبە الماسۋ باعىتىنداعى بىرلەسكەن جۇمىسىمىزدىڭ ماڭىزدىلىعى تالقىعا سالدىق»، - دەدى ول.

اندوررا - اندوررا كنيازدىگى. ەۋروپاداعى شاعىن مەملەكەت. فرانسيا مەن يسپانيا ارالىعىندا، شىعىس پيرەنەي اۋماعىندا ورنالاسقان. جەر كولەمى 465 ك م، حالقى — 78,1 مىڭ (2013)، ولاردىڭ ىشىندە بايىرعى حالقىنىڭ (اندوررالىقتار) سانى — 19 مىڭ شاماسىندا، قالعاندارى — پورتۋگالدار، يسپاندىقتار، فرانسۋزدار.

اۆتور مارلان جيەمباي