قورعانىس مينيسترلىگى قازاقستان مەن تۇركيانىڭ اسكەري تەحنيكاسىن سالىستىردى
«سىناقتان وتكىزگەن كەزدە «بارىس» بروندالعان دوڭگەلەكتى ماشيناسىنىڭ جاۋىنكەرلىك مودۋلى مەن ونىڭ دوڭگەلەكتەر بازاسى سيپاتتامادا كورسەتىلگەن مالىمەتتەرمەن سايكەسپەيتىنى بەلگىلى بولدى جانە كونسترۋكتيۆتىك وزگەرىستەردى قاجەت ەتەتىنى انىقتالدى. «بارىس» تەحنيكاسى قوزعالتقىشتىڭ تارتۋ كۇشى جەتىسپەۋىنەن ارىقتان وتە الماي قويدى. 2021 -جىلى جۇرگىزىلگەن سىناق «بارىس» بروندى دوڭگەلەكتى ماشيناسىنىڭ ءجۇرىس بولىگىندە، موتور- جەتەك بولىگىندە، سالقىنداتۋ جۇيەسىندە اقاۋلار كوپ ەكەنىن كورسەتتى (ءجۇرىس كەزىندە قوزعالتقىش قايتا- قايتا قىزىپ كەتىپ وتىردى)»، - دەپ جازىلعان مينيسترلىكتىڭ ب ا ق- تا جاريالانعان ماقالاعا بەرگەن جاۋابىندا.
سونداي- اق ۆەدومستۆو ماماندارى تۇركيالىق تەحنولوگيامەن جاسالعان «ARMА» تەحنيكاسى مەن «قازاقستان پاراماۋنت ينجينيرينگ» كومپانياسى شىعاراتىن «بارىس» تەحنيكاسىنىڭ ايىرماشىلىعىنا توقتالادى.
«اسپاق جۇيەسىن كونسترۋكسيالاۋ كەزىندە كەتكەن قاتەلىكتەردىڭ سالدارىنان «بارىس» بروندالعان دوڭگەلەكتى ماشيناسىنىڭ دوڭگەلەكتەرى اعىتىلىپ كەتە بەرەدى، تەجەۋىشتىڭ سۋپپورتى تەز قىزادى. بۇل تەجەۋىش جۇيەنىڭ تيىمدىلىگىن ازايتادى. «ARMА» ساۋىتتى دوڭگەلەكتى ماشيناسىن جاۋىنگەرلىك سىناقتان وتكىزگەن كەزدە ءجۇرىس بولىگىندە ايتارلىقتاي اقاۋلار بايقالعان جوق. «بارىس» ساۋىتتى دوڭگەلەكتى ماشيناسىنداعى «انسار» اتىس مودۋلى دالدىك جونىنەن ايتارلىقتاي قالىس قالىپ جاتتى. 2ا72 زەڭبىرەگىنەن اتقان كەزدەدە، وپتيكامەن، مونيتورمەن جۇمىس ىستەگەن كەزدە دە اقاۋلار تىركەلدى»، - دەپ جازىلعان مينيسترلىكتىڭ تۇسىندىرمەسىندە.
«قازاقستان پاراماۋنت ينجينيرينگ» ج ش س- نىڭ ءوز ونىمدەرى شەتەلدىك بالامالارىنان ەكى ەسە ارزان ەكەنى تۋرالى ۋاجىنە وراي مىنا مالىمەتتەردى ۇسىنامىز»، - دەلىنگەن مينيسترلىكتىڭ ب ا ق- تا جاريالانعان سىني ماقالاعا بەرگەن جاۋابىندا.
«ارلان» بروندى تەحنيكاسى (قازاقستان) - 424945440 تەڭگە.
«كوبرا 2» بروندى تەحنيكاسى (تۇركيا) - 345600000 تەڭگە.
«Aravis» بروندى تەحنيكاسى (فرانسيا) - 255750000 تەڭگە.
«Cougar H» بروندى تەحنيكاسى (ا ق ش) - 218550000 تەڭگە.
«تيگر» بروندى تەحنيكاسى (رەسەي فەدەراتسياسى) - 192000000 تەڭگە.
«ياعني، بۇل مالىمدەمە شىندىققا جاناسپايدى»، - دەيدى ۆەدومستۆو ماماندارى.
اۆتور ەسىمجان ناقتىباي
