كەلەسى جىلدان باستاپ اسكەرگە تىركەۋ ءتارتىبى وزگەرمەك
ق ر قورعانىس ءمينيسترىنىڭ ورىنباسارى دارحان احمەديەۆ ورتالىق كوممۋنيكاتسيالار قىزمەتىندە وتكەن بريفينگىدە وسىنداي مالىمەت ايتتى، دەپ حابارلايدى قازاقپارات ءتىلشىسى.
«مەملەكەتتىك بازالارمەن ينتەگراتسيا جاساۋ ارقىلى اسكەري بيلەت راسىمدەۋ پروتسەسىنىڭ كولەمى 2-3 ەسە ازايادى. ودان بولەك اسكەري بيلەتكە دەيىن اسكەرگە تىركەۋ بيلەتى دەگەن بار. كەلەسى جىلى سول تىركەۋ بيلەتىن مۇلدەم الىپ تاستاعىمىز كەلىپ وتىر. مىسالى، قازىر 17 جاستاعى اسكەر قاتارىنا شاقىرىلماعان ازاماتتار مەديتسينالىق تەكسەرۋدەن وتەدى. سودان كەيىن دەنساۋلىعىنا قاراي قاي اسكەري كوميسسارياتقا تىركەلگەنى ايتىلىپ، تىركەۋ بيلەتى بەرىلەدى. ءبىراق كەلەسى جىلدان باستاپ وسى پروتسەستى باسقاشا جاساماقشىمىز. ونداي ۇعىمنىڭ ءوزىن الىپ تاستايمىز. اسكەرگە تىركەۋ بيلەتى دەگەن بولمايدى»، - دەدى ءمينيستردىڭ ورىنباسارى.
ونىڭ ايتۋىنشا اسكەرگە تىركەۋ بيلەتىنە جازىلىپ كەلگەن مالىمەتتەردى ەندى ءار بولاشاق سارباز ءوزىنىڭ «جەكە كابينەتىنەن» كورە الادى.
«اسكەرگە شاقىرىلۋشىنىڭ جەكە كابينەتىنە قانداي كوميسسارياتقا تىركەلگەنى تۋرالى قىسقاشا SMS كەلەدى. 18-گە تولعاننان كەيىن ۋنيۆەرسيتەتكە بارساڭىز، «ءسىز جوعارى ءبىلىم الىپ جاتقان مەرزىمدە اسكەري مىندەتتەن بوساتىلدىڭىز» دەگەن قىسقاشا حابارلاما كەلەدى. ال ەگەر ۋنيۆەرسيتەتكە بارماساڭىز، قاي كوميسسارياتقا تىركەلگەنىڭىزدى جەكە كابينەتتەن كورە الاسىز. كەلەسى جىلدان باستاپ وسى وزگەرىستەردى ەنگىزەمىز دەگەن ءۇمىت بار»، - دەدى دارحان احمەديەۆ.
مينيسترلىكتىڭ دەرەگى بويىنشا، بيىل قارۋلى كۇشتەردە 7 سۋيتسيد ارەكەتى تىركەلىپ، تورتەۋى قايعىلى اياقتالعان.
اۆتور ەسىمجان ناقتىباي
