پرەمەر-مينيستر رەۆاكسيناتسيالاۋ جۇمىستارىن جانداندىرۋدى تاپسىردى

نۇر-سۇلتان. قازاقپارات - كوروناۆيرۋسپەن كۇرەس بويىنشا بارلىق ماسەلەنى ۆەدومستۆوارالىق كوميسسيا وتىرىستارىندا جەدەل قاراۋ كەرەك.

بۇل تۋرالى ۇكىمەت وتىرىسىندا پرەمەر-مينيستر ءاليحان سمايىلوۆ ايتتى، دەپ حابارلايدى قازاقپارات ءتىلشىسى.

«جالپى كوروناۆيرۋس ينفەكسياسىن جۇقتىرۋدىڭ كوبەيگەنىن، اسىرەسە، ەلوردا جانە قاراعاندى وبلىسىندا وسكەنىن كورىپ وتىرمىز. كۇن سايىن رەسپۋبليكا بويىنشا 3 مىڭعا دەيىن جاعداي تىركەلەدى. بۇل - جوعارى كورسەتكىش. سوندىقتان كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا شەكتەۋ شارالارىن كۇشەيتتى، ولار وڭىرلەرمەن جانە «اتامەكەن» پالاتاسىمەن الدىن الا كەلىسىلدى»، - دەدى ءا. سمايىلوۆ.

وسى ورايدا ۇكىمەت باسشىسى دەنساۋلىق ساقتاۋ مينيسترلىگى ەپيدەميولوگيالىق جاعدايعا تۇراقتى مونيتورينگ جۇرگىزۋى قاجەت ەكەنىن تاپسىردى.

«شەكتەۋ شارالارىنىڭ ساقتالۋىن قامتاماسىز ەتۋ كەرەك. ماسكا تاعۋ، الەۋمەتتىك قاشىقتىقتى ساقتاۋ سياقتى الدىن الۋدىڭ نەگىزگى شارالارى قاتاڭ ساقتالۋى ماڭىزدى. ۆاكسيناتسيالاۋ مەن رەۆاكسيناتسيالاۋدىڭ تومەن قارقىنى ەپيدەميولوگيالىق جاعدايدىڭ كۇرت ناشارلاپ كەتۋىنە الىپ كەلەدى. اكىمدىكتەرگە حالىقتى ۆاكسيناتسيالاۋ جانە رەۆاكسيناتسيالاۋ جۇمىستارىن جانداندىرۋدى تاپسىرامىن. بارلىق پروبلەمالىق ماسەلەلەردى ۆەدومستۆوارالىق كوميسسيا وتىرىستارىندا جەدەل قاراپ، ءتيىستى شارالار قابىلداۋ قاجەت»، - دەدى ءاليحان سمايلوۆ.

بۇدان بۇرىن حابارلانعانداي، ۇكىمەت وتىرىسىندا قىركۇيەك ايىندا كوروناۆيرۋستىڭ تارالۋى تومەندەۋى مۇمكىن ەكەنى ايتىلدى.

فوتو: t.me/KZgovernment