اسكەردەگى ءولىم-ءجىتىمنىڭ الدىن الۋعا ارنالعان باعدارلاما ازىرلەنىپ جاتىر
بۇل تۋرالى اتالعان ۆەدومستۆونىڭ قازاقپارات ءتىلشىسى ساۋالىنا بەرىلگەن جاۋاپتا ايتىلعان.
«اسكەردەگى ءولىم-ءجىتىمدى ازايتۋ ماقساتىندا كۇندەلىكتى نۇسقاۋلىقتار، قاۋىپسىزدىك شارالارى بويىنشا ساباقتار، تاربيەلىك جانە الەۋمەتتىك ءىس-شارالار ۇيىمداستىرىلادى. سونىمەن قاتار ساربازدار اراسىندا جەكە جانە جاسىرىن ساۋالنامالار جۇرگىزىلەدى. ودان بولەك قۇقىق بۇزۋشىلىقتاردىڭ الدىن الۋ ماقساتىندا جەكە قۇراممەن جۇمىس ىستەۋدىڭ زامان تالابىنا ساي ادىستەرى قولدانىلادى. ونىڭ ىشىندە سىني تۇرعىدان ويلاۋ تەحنولوگياسى مەن كەيس-ستادي ءادىسى بار. ول جەردە قاتەلەر مەن ولقىلىقتار بويىنشا ناقتى مىسالدار كەلتىرىلىپ، قارالادى»، - دەگەن جاۋاپ كەلدى مينيسترلىكتەن.
سونىمەن قاتار مينيسترلىكتىڭ مالىمەتىنشە اسكەري بولىمدەردە اشىق ەسىك كۇنى، سۇراق-جاۋاپ كەشى، پروكۋرور ساعاتى جانە كوشپەلى سوت شاراسى ۇيىمداستىرىلادى.
«جاس ساربازدارعا اسكەري تاربيە بەرۋدە قوعامدىق ۇيىمدار جانە ينستيتۋتتارمەن بىرلەسىپ اتقارعان جۇمىستىڭ ماڭىزى ەرەكشە. ساربازداردىڭ اتا-انالارى، بولىمشە كومانديرلەرى مەن تاربيە قۇرىلىمى وفيتسەرلەرىنىڭ قاتىسۋىمەن ارنايى چاتتار جۇمىس ىستەيدى. سول سياقتى اسكەري مىندەتىن وتەۋشىلەردىڭ اپتا سايىن اتا-انالارىمەن تەلەفون ارقىلى سويلەسۋ مۇمكىندىگى بار»، - دەيدى ۆەدومستۆودان.
ودان بولەك، قورعانىس مينيسترلىگى اسكەردەگى ءولىم-ءجىتىمدى بولدىرماۋ مەن تاربيە جۇمىسى جۇيەسىن جەتىلدىرۋگە باعىتتالعان «ءومىردى ساقتا» اتتى ۆەدومستۆوارالىق باعدارلاما دايىنداۋ بويىنشا جۇمىستىڭ باستالعانىن حابارلاپ وتىر.
«اتالعان باعدارلاما ۇزاقمەرزىمدى پەرسپەكتيۆانى كوزدەيدى. باعدارلاما اسكەري ورتادا ءولىم-ءجىتىمنىڭ الدىن الۋدىڭ ماقساتتارى مەن مىندەتتەرى، ەرەجەلەرى مەن نەگىزگى باعىتتارىن ايقىندايتىن ستراتەگيالىق قۇجات. بۇل قۇجات اسكەري قىزمەتتىڭ ەرەكشەلىگى مەن جاي-كۇيىن ەسكەرە وتىرىپ، وعان سايكەس كەلەتىن ۆەدومستۆولىق ءىس-شارالار جوسپارىن ازىرلەۋگە نەگىز بولادى»، - دەلىنگەن حابارلامادا.
رەسمي ساۋال جاۋابىندا ايتىلعانداي ساربازداردىڭ قاۋىپسىزدىگىن قامتاماسىز ەتۋ ءۇشىن «پيراميدا»، «جاۋىنگەرلىك دوس» جانە «ناپارنيك» باعدارلاماسى قولدانىلادى. سونداي-اق، كازارمالاردا بەينەباقىلاۋ كامەرالارى مەن سەنىم تەلەفونى جۇمىس ىستەپ تۇر.
«كۇن سايىن اسكەري پوليتسەيلەر جانە ءبولىمنىڭ مەديتسينا قىزمەتكەرلەرىنىڭ قاتىسۋىمەن ساربازداردى قاراپ-تەكسەرۋ جۇرگىزىلەدى»، - دەپ تولىقتىردى مينيسترلىكتەن.
بۇعان دەيىن قازاقستان اسكەرىندە الىمجەتتىك ماسەلەسىنىڭ قالاي شەشىلىپ جاتقانى تۋرالى حابارلاعان ەدىك.
سونىمەن قاتار جاس سارباز الىبەك قالبايدىڭ ولىمىنە قاتىستى سوڭعى مالىمەتتەر بەلگىلى بولدى. ودان بولەك، قورعانىس مينيسترلىگى اسكەردە ساربازدىڭ سۋيتسيدكە بارۋىنا مۇمكىن سەبەپتەردى اتاپ بەردى.
