قاڭتار وقيعاسىنا ۇيىمداسقان قىلمىستىق توپتار، دەسترۋكتيۆتى ءدىن وكىلدەرى قاتىسقان
بۇل تۋرالى ق ر باس پروكۋراتۋراسى ارنايى پروكۋرورلار قىزمەتى باستىعىنىڭ ورىنباسارى نۇرلىبەك ءسابيتوۆ ايتتى، دەپ حابارلايدى قازاقپارات ءتىلشىسى.
«باس پروكۋراتۋرا قاڭتار وقيعالارىنا بايلانىستى قىلمىستىق ىستەردى تەرگەۋ بارىسى تۋرالى حابارلاۋدى جالعاستىرۋدا. جالپى وسى وقيعالاردىڭ ناتيجەلەرىندە ەلىمىزدە 5 مىڭنان استام سوتقا دەيىنگى تەرگەپ-تەكسەرۋلەر تىركەلدى. قيراتۋلار، مەملەكەتتىك وبەكتىلەردى ورتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، سول قايعىلى كۇندەرى قىلمىسكەرلەر اسكەريلەرگە شابۋىل جاساپ، جولدىڭ ءجۇرۋ بولىگىن جاپقان، اۆتوكولىكتەردى ورتەپ، ازاماتتاردى تارتىپسىزدىكتەرگە قاتىسۋعا كوندىرگەن جانە توناۋلار جاساعان.
«قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋدى بۇعاتتاۋ ءۇشىن ولار پوليتسيا ورگاندارىنىڭ عيماراتتارىنا شابۋىلدار جاسادى. جاپپاي تارتىپسىزدىكتەرگە ۇيىمداسقان قىلمىستىق توپتار، دەسترۋكتيۆتى ءدىني اعىمداردىڭ مۇشەلەرى جانە بۇرىن سوتتى بولعان ادامداردىڭ قاتىسقانىن ارنايى پروكۋرورلار انىقتادى. بۇگىنگى كۇنى بارلىق قىلمىستىق ىستەر بويىنشا 286 كۇدىكتى قاماۋدا. ولاردىڭ قيراتۋلارعا، عيماراتتاردى ورتەۋگە، قارۋلاردى جىمقىرۋعا، مەملەكەتتىك وبەكتىلەرگە جانە قۇقىق قورعاۋ ورگاندارى قىزمەتكەرلەرىنە قارۋلى شابۋىل جاساۋعا بەلسەندى قاتىسقانى انىقتالدى»، - دەدى نۇرلىبەك ءسابيتوۆ.
باس پروكۋراتۋرا وكىلىنىڭ مالىمەتىنشە، ءاربىر قاماۋعا الىنعان ادام بويىنشا ولاردىڭ قىلمىستارعا قاتىستىلىعى تۋرالى جەتكىلىكتى مالىمەتتەر بار. ولاردىڭ بارلىعىنا قورعالۋ قۇقىعى، سانيتارلىق نورمالار، تاماقتانۋ، ءدارى-دارمەكتەر جانە ۇستاۋدىڭ ءتيىستى جاعدايلارى قامتاماسىز ەتىلۋدە»، - دەدى ول.
