قورعانىس مينيسترلىگىنىڭ ۇشاقتارى چەحيادا جاڭارتۋدان ءوتتى

نۇر-سۇلتان. قازاقپارات – ق ر قورعانىس مينيسترلىگىنىڭ L-39 وقۋ-جاۋىنگەرلىك ۇشاقتارى چەح رەسپۋبليكاسىندا مودەرنيزاتسيادان جانە كۇردەلى جوندەۋدەن ءوتتى، دەپ حابارلايدى قازاقپارات.

ءمالىم ەتىلگەندەي، L-39 - كۋرسانتتاردى ۇشۋدىڭ العاشقى تەحنيكاسىنا ۇيرەتۋگە ارنالعان ۇشاقتار.

ولار مەملەكەتتىك قورعانىس تاپسىرىسىنىڭ شارتى اياسىندا ءوندىرۋشى زاۋىتقا جوندەۋگە جىبەرىلگەن.

مودەرنيزاتسيادان وتكەن ۇشاقتىڭ جاڭا سيفرلىق جانە كاتاپۋلتتىك جۇيەسى، وبەكتيۆتى باقىلاۋى، بايلانىس قۇرالدارى جانە تاعى باسقالارى جاڭاردى.

«بۇل ۇشاقتا كۋرسانتتاردى ۇيرەتەمىز. ءوز بەتىمەن ۇشۋ ولار ءۇشىن اسا ماڭىزدى. وسىدان ۇشۋ شەبەرلىگىن يگەرۋدىڭ العاشقى قادامى باستالادى. بۇداي كەيىن ولارعا جاي جانە كۇردەلى پيلوتاجعا، باعىت بويىنشا، بۇلتتاردا، تومەن بيىكتىكتە ۇشۋعا رۇقسات بەرىلەدى»، - دەدى اۆياتسيالىق وقۋ-جاتتىعۋ ورتالىعىنىڭ كومانديرى ازامات اسانوۆ.

قازىر جاڭعىرتىلعان ۇشۋ اپپاراتتارىندا اۋە قورعانىسى كۇشتەرى اسكەري ينستيتۋتىنىڭ ءۇشىنشى كۋرس كۋرسانتتارى تاجىريبەدەن ءوتىپ جاتىر.

ۇشۋ باستالعانعا دەيىن بولاشاق ۇشقىشتار ۇشاقتىڭ تەوريالىق جانە ماتەريالدىق بولىگىن، ۇشۋ جۇمىسىن جانە ەرەكشە جاعدايلاردا ارەكەت ەتۋ ءتارتىبىن رەتتەيتىن قۇجاتتامانى زەردەلەيدى. ولارعا L-39 وقۋ-جاتتىعۋ جاۋىنگەرلىك ۇشاعىن مەڭگەرۋگە تاجىريبەلى ۇشقىش-نۇسقاۋشىلار كومەكتەسەدى.