الماتىدا ەلەكتر قۋاتىنىڭ تاريفتەرى كوتەرىلەدى
باسەكەلەستىكتى قورعاۋ جانە دامىتۋ اگەنتتىگىنىڭ وتىن-ەنەرگەتيكا ونەركاسىبى دەپارتامەنتى ديرەكتورىنىڭ مىندەتىن اتقارۋشى قۋات اسامبەكوۆتىڭ سوزىنشە، پيلوتتىق جوبا اياسىندا الماتى تۇرعىندارىنا ەلەكتر ەنەرگياسى ءۇشىن تۇبىرتەكتەردەگى اي سايىنعى تولەم قۇنى تۇتىنىلاتىن ەنەرگيا كولەمىنە بايلانىستى ورتا ەسەپپەن 300 تەڭگەگە ارتادى.
«حالىقتىڭ الەۋمەتتىك مۇقتاج توپتارى ءۇشىن تاريف وزگەرمەيدى، ايىرمانى ولارعا اتاۋلى تۇرعىن ءۇي كومەگى ەسەبىنەن مەملەكەت سۋبسيديالايتىن بولادى. قازاقستاننىڭ قالعان وڭىرلەرىندە ەلەكتر ەنەرگياسىنا تاريفتەردى سارالاۋدى جويۋ 2023-جىلدان باستالادى»، - دەدى ول.
سپيكەر تۇرمىستىق تۇتىنۋشىلار ءۇشىن تاريفتەر زاڭدى جانە بيۋدجەتتىك تۇتىنۋشىلار ءۇشىن جاساندى وسىمگە بايلانىستى تومەندەۋ باعىتىندا سارالانعانىن ءتۇسىندىردى.
«تۇتىنۋشىلار اراسىنداعى تاريفتەردىڭ سارالانۋىن تومەندەتۋ شامامەن %10 دى قۇرايدى. ياعني، تۇرمىستىق تۇتىنۋشىلار ساناتىنا 10 پايىزعا ءوسىم بولادى. ءبىراق بۇل جەردە ماسەلە قىمباتتاتۋدا ەمەس. ورتاشا تاريف مولشەرلەمەسى وسپەيدى. مۇندا ماسەلە ايىرماشىلىقتى ازايتۋ تۋرالى بولىپ وتىر. سايىپ كەلگەندە، بارلىعى بىردەي تاريف تولەۋى كەرەك»، - دەدى قۋات اسامبەكوۆ.
ول جوبانىڭ ءبىرىنشى كەزەڭ اياسىندا جەكە جانە زاڭدى تۇلعالاردىڭ تاريفتەرى اراسىنداعى ايىرماشىلىق شامامەن 30 پايىزعا تومەندەيتىنىن اتاپ ءوتتى. بۇعان دەيىن باسەكەلەستىكتى قورعاۋ جانە دامىتۋ اگەنتتىگى ءتوراعاسىنىڭ ءبىرىنشى ورىنباسارى رۋستام احمەتوۆ قازاقستاندا ەلەكتر ەنەرگياسىنا تاريفتەردى سارالاۋدى جويۋ بويىنشا ازىرلەنگەن پيلوتتىق جوبانىڭ ارتىقشىلىعى تۋرالى ايتقان بولاتىن.
