كەلەسى جىلدان باستاپ مەكتەپ فورماسىنا قويىلاتىن تالاپتار قالاي وزگەرەدى
اتالعان وزگەرىستەر جوباسى ق ر وقۋ- اعارتۋ ءمينيسترىنىڭ ءتيىستى بۇيرىعىندا كورىنىس تاپقان. ۆەدومستۆونىڭ دەرەگى بويىنشا، بۇل بۇيرىق كەلەسى، ياعني 2023-2024 وقۋ جىلىندا كۇشىنە ەنۋى ءتيىس.
سونىمەن، مەكتەپ فورماسىنا قويىلاتىن جاڭا تالاپتار مىناداي:
1. قازىرگى تالاپ بويىنشا قىزداردىڭ مەكتەپ فورماسى: پيدجاك، جيلەت، يۋبكا، شالبار، كلاسسيكالىق جەيدە (قىسقى ۋاقىتتا: تريكوتاج جيلەت، سارافان، ۆودولازكا).
قىزدارعا ارنالعان شالبارلار ەركىن تىگىلگەن جانە ۇزىندىعى بويىنشا توبىقتى جاۋىپ تۇرۋى ءتيىس. ال جاڭا رەداكسيادا كلاسسيكالىق جەيدەنىڭ ورنىنا تۇيمەلەرى نەمەسە بەكىتكىشى بار تريكوتاج كارديگان (بومبەر) كيۋ تالاپ ەتىلمەك. قالعان تالاپتىڭ ءبارى وزگەرىسسىز قالادى.
2. قولدانىستاعى تالاپ بويىنشا مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرىن (بەلگىلەر، تىگىسپەلەر جانە باسقا) سالۋعا بولادى. ولار كيىمنىڭ نەمەسە اكسەسسۋاردىڭ (پيدجاك، جيلەت، گالستۋك) جوعارعى بولىگىندە ورنالاسادى.
جاڭا رەداكسيا: مەكتەپ فورماسىنا ورتا ءبىلىم بەرۋ ۇيىمىنىڭ ەرەكشەلىك بەلگىلەرىن (بەلگىلەر، تىگىسپەلەر، شيەۆرون جانە باسقا) ورنالاستىرۋعا رۇقسات ەتىلەدى.
3. قولدانىستاعى تالاپ بويىنشا، ءبىلىم سالاسىنا جاۋاپتى جەرگىلىكتى باسقارما، بولىمدەر اتا- انالارعا مەكتەپ فورماسىن ساتىپ الۋعا بولاتىن وتاندىق وندىرۋشىلەردى ۇسىنادى. جاڭا رەداكسيادا بۇل تارماق قالعانىمەن، قانداي ءوندىرۋشىنىڭ فورماسىن الۋ كەرەكتىگىن ءار اتا- انا ءوزى شەشەدى. ءبىلىم باسقارماسىنىڭ نەمەسە ءبولىمىنىڭ فورما تۇسىنە قاتىستى ۇسىنىسىن عانا ەسكەرۋى كەرەك.
«مەكتەپ فورماسىنىڭ جەكەلەگەن وندىرۋشىلەرىنە ارتىقشىلىق بەرۋگە جول بەرىلمەيدى. اتا- انالار ءوندىرۋشىنى تاڭداۋدا جانە مەكتەپ فورماسىن الۋدا تاۋەلسىز. وبلىستىڭ، رەسپۋبليكالىق ماڭىزى بار قالانىڭ، استانانىڭ، اۋداننىڭ (وبلىستىق ماڭىزى بار قالانىڭ) ءبىلىم بەرۋدى باسقارۋ ورگاندارى اتا- انالار مەن ءبىلىم بەرۋ ۇيىمدارىنا اكىمشىلىك اۋماقتا مەكتەپ فورماسىنىڭ ءبىرىڭعاي ءتۇسىن تاڭداۋدى ۇسىنادى»، - دەپ جازىلعان تولىقتىرۋدا.
سونداي- اق، بۇيىرقتىڭ جاڭا نۇسقاسىندا «قوعامدىق كەڭەس» ۇعىمى ناقتىلانعان. ياعني، قوعامدىق كەڭەسكە مەكتەپ كەڭەسى، قامقورشىلىق كەڭەس، اتا- انالار كەڭەسى جاتاتىنى ايرىقشا اتاپ كورسەتىلگەن. بۇل كەڭەس مەكتەپ فورماسىنىڭ ءتۇسىن، فاسونىن تاڭداۋعا جانە يۋبكانىڭ ۇزىندىعىن ايقىنداۋعا قاتىسادى، ءبىلىم الۋشىلاردىڭ مەكتەپ فورماسىن ساقتاۋى ماسەلەسىن تالقىلاۋعا ارالاسادى. بۇعان دەيىن دە مينيسترلىك اتا- انا مەكتەپ فورماسىن ەركىن تاڭداي الاتىنىن ايتقان بولاتىن.
اۆتور ەسىمجان ناقتىباي
