ساۋلەت سالاسىن وعان مۇلدە قاتىسى جوق ازاماتتار باسقارىپ وتىر – ق ر قۇرمەتتى ساۋلەتشىسى
مۇنداي پىكىردى قازاقستاننىڭ قۇرمەتتى ساۋلەتشىسى ارقىنجان مامەتوۆ ءبىلدىردى، دەپ حابارلايدى قازاقپارات ءتىلشىسى.
«وكىنىشكە قاراي، ءبىزدىڭ ەلىمىزدە ساۋلەت جانە قالا قۇرىلىسى باسقارمالارىن قۇرىلىسقا، جالپى بۇل سالاعا مۇلدە قاتىسى جوق ادامدار باسقارىپ وتىر. سول سەبەپتى، جاڭادان سالىناتىن نىسانداردى تۇرعىندار ءۇشىن قولايلى ەتۋ ماسەلەسى ءالى شەشىمىن تاپپاي كەلەدى. بۇل باعىتتاعى كاسىبي ۇيىمداستىرۋشىلىقتىڭ جەتىسپەۋى - قالالار مەن ەلدى مەكەندەردىڭ ينفراسترۋكتۋراسىن دامىتۋعا كەدەرگى بولىپ وتىر. كاسىبي ماماندار جاساعان ارحيتەكتۋرالىق جوسپارلار ءىس جۇزىندە باسقاشا ورىندالادى. قۇرىلىستى ناقتى جۇرگىزەتىن كاسىپورىندار جوسپاردىڭ جارتىسىنان كوبىن قىسقارتىپ تاستايدى. ناتيجەسىندە مەكتەپ، اۋرۋحانا، جاياۋ جۇرگىنشىلەرگە ارنالعان جول سياقتى قاجەتتى الەۋمەتتىك نىساندار جەتىسپەيدى»، - دەپ ماسەلەلەردى اتادى ارقىنجان مامەتوۆ.
سونداي-اق، بريفينگ بارىسىندا ساۋلەتشى الەكسەي ابيلوۆ ساۋلەتشىلەردىڭ مارتەبەسى تومەندەپ كەتكەنىن ايتتى.
«بۇگىندە ساۋلەتشىلەردىڭ مارتەبەسى تومەندەپ بارادى. ساۋلەتشى - ءۇيدىڭ قاسبەتتەرىن ارلەيتىن، ونىڭ ديزاينىن جاسايتىن ادام ەمەس. ول شىن مانىندە قالا، وبلىس نەمەسە اۋىلدىڭ بولاشاعىن قالىپتاستىراتىن مامان. ماسەلەن، ەجەلگى مىسىردا ساۋلەتشى - پەرعاۋىننان كەيىنگى لاۋازىمدا بولعان. ال، قازىر بۇل سالانى كوشەدەن كەلگەن ماماندار باسقارىپ ءجۇر»، - دەپ توقتالدى الەكسەي ابيلوۆ.
سونىمەن قاتار، ساۋلەتشى قالانىڭ باس جوسپارىنا باعىنباعان قۇرىلىس كومپانيالارىن جازالاۋدى ۇسىندى.
