تۇقىم شارۋاشىلىعىن دامىتۋدىڭ جەكە ستراتەگياسى ازىرلەنبەك
«قازاقستاندى وتاندىق سەلەكتسيانىڭ اۋىل شارۋاشىلىعى داقىلدارىنىڭ تۇقىمدارىمەن قامتاماسىز ەتۋدىڭ جانە ءبىرىڭعاي تىزبەكتە «سەلەكتسيا-تۇقىم شارۋاشىلىعى-ءوندىرىس» بىرىكتىرىلەتىن تۇقىم شارۋاشىلىعىنىڭ عىلىمي-وندىرىستىك ورتالىعىن قۇرۋدى، سونداي-اق بارلىق دەڭگەيلەردە تۇقىم شارۋاشىلىعىن جۇرگىزۋدىڭ ماتەريالدىق-تەحنيكالىق بازاسىن جاقسارتۋدى كوزدەيتىن جەكە ستراتەگياسىن ازىرلەۋ جوسپارلانىپ وتىر. بۇل تۇرعىدا يمپورتقا تاۋەلدىلىكتى ازايتۋعا ەرەكشە ءمان بەرىلگەن»، - دەلىنگەن مينيسترلىكتىڭ قازاقپارات اگەنتتىگىنە بەرگەن جاۋابىندا.
بۇدان باسقا، كەلەسى جىلدان باستاپ دامىعان ەلدەردىڭ تاجىريبەسى بويىنشا سيفرلىق فورماتتا وريگيناتورلاردان باستاپ تاۋار شارۋاشىلىقتارىنا دەيىن جوعارى رەپرودۋكتسيالى تۇقىمداردىڭ جىلجۋىن قاداعالاۋعا مۇمكىندىك بەرەتىن جاڭا اقپاراتتىق جۇيە ەنگىزىلەتىن بولادى.
بۇل ولاردىڭ پايدالانىلۋىنا قاتاڭ باقىلاۋ ورناتۋعا مۇمكىندىك بەرەدى.
«سونىمەن قاتار تۇقىم شارۋاشىلىعىن قولداۋ بويىنشا ارنايى بيۋجەتتىك باعدارلاما جۇمىس ىستەيدى، ول تۇقىم شارۋاشىلىعىنىڭ بارلىق كەزەڭدەرىن قامتيدى. ەليتالى تۇقىم ءوسىرۋ جانە تۇقىم ءوسىرۋ شارۋاشىلىقتارىنا تۇقىم ءوندىرۋ ءۇشىن بىرەگەي ءارى ەليتالى تۇقىم ساتىپ الۋ قۇنى (%70) ارزانداتىلادى»، - دەپ اتالىپ وتكەن ۆەدومستۆو مالىمەتىندە.
بۇدان بۇرىن حابارلانعانداي، بيىل ۇكىمەتتىڭ كەڭەيتىلگەن وتىرىسىندا پرەزيدەنت اۋىل شارۋاشىلىعى داقىلدارىنىڭ تۇقىمىن ەلىمىزدە قامتاماسىز ەتۋگە، سونداي-اق ولاردىڭ ساپاسىنا قاتىستى ەرەكشە توقتالدى.
تۇقىم شارۋاشىلىعىن قولداۋعا بيىل جەرگىلىكتى بيۋجەتتەردە 11,8 ميلليارد تەڭگە قاراستىرىلعان.
