زاڭسىز التىن ىزدەۋشىلەردەن بەستوبە شاحتاسىنان دەرەۋ شىعۋ تالاپ ەتىلدى

كوكشەتاۋ. قازاقپارات - اقمولا وبلىسىنىڭ بەستوبە كەنىشىندەگى شاحتادا التىن كەنىن زاڭسىز ىزدەۋمەن اينالىسىپ جۇرگەندەر ءالى دە بار.

«التىن الماس ا ك» ا ق- نىڭ باسشىلىعى شاحتاعا ءوز بەتىمەن تۇسكەن ادامداردىڭ ومىرىنە الاڭداپ وتىر، دەپ حابارلايدى قازاقپارات ءتىلشىسى.

«التىن الماس ا ك» ا ق بەستوبە كەنىشىنىڭ ىستەن شىققان التىن ءوندىرۋ شاحتاسىندا زاڭسىز التىن وندىرۋشىلەردىڭ ولىمگە ۇشىراعانىنا الاڭداپ وتىر. وسىعان بايلانىستى اتالمىش شاحتاداعى زاڭسىز كەنشىلەردى شاحتادان شۇعىل تۇردە شىعۋعا شاقىرادى.

كومپانيا بەستوبە كەنىشىندەگى شاحتادا التىندى زاڭسىز ىزدەۋمەن اينالىسىپ جۇرگەندەردىڭ دەنساۋلىعى مەن ءومىرى ءۇشىن جاۋاپ بەرمەيدى.

وتكەن اپتادا شاحتادا ەكى ادامنىڭ ءمايىتى، جاراقات العان 1 ادام تابىلدى. 22 - شىلدەدە 655 مەتر تەرەڭدىكتە جارىلعىش ماتەريالداردى تاسىمالداۋعا ارنالعان اربادا 1 ادامنىڭ دەنەسى تابىلسا، 25 شىلدەدە 1 ادامنىڭ ءمايىتى مەن كوپتەگەن جاراقاتى بار ادام تابىلدى.

ولار شاحتادا جاسالعان رۇقسات ەتىلمەگەن جارىلىس كەزىندە قۇلاعان تاۋ جىنىستارىنىڭ استىندا قالعان.

زاڭسىز التىن ىزدەۋشىلەر مايىتتەردى كەن ورنىنىڭ قىزمەتكەرلەرى جوعارى كوتەرىپ الۋى ءۇشىن شاحتانىڭ وقپانىنا اكەلگەن.

25- شىلدەدە جەر بەتىنە شىعارىلعان زاڭسىز التىن ىزدەۋشىلەردىڭ ءبىرىنىڭ ايتۋىنشا، شاحتادا زاڭسىز كاسىپپەن اينالىساتىن ادامدار ءالى دە بار. كومپانيا قايتىس بولعانداردىڭ وتباسىلارىنا كوڭىل ايتىپ، التىندى زاڭسىز ءوندىرۋ زاڭعا قايشى جانە ومىرگە اسا قاۋىپتى ەكەنىن ەسكە سالادى»، - دەدى ۆەدومستۆودان.

وسى رەتتە، «التىن الماس ا ك» ا ق- نىڭ باسپا ءسوز قىزمەتى قىلمىستىق كودەكستىڭ 334-بابى بويىنشا جەر قويناۋىن ءوز بەتىنشە پايدالانعانى ءۇشىن جاۋاپكەرشىلىك قاراستىرىلعانىن، زاڭ بۇزعان ادامدار 5 جىلعا دەيىن باس بوستاندىعىنان ايىرىلۋى مۇمكىن ەكەنىن ەسكە سالادى.

ال قىلمىستىق كودەكستىڭ 269-1-بابىندا كۇزەتىلەتىن ايماققا زاڭسىز كىرگەندەرگە 10 جىلعا دەيىن باس بوستاندىعىنان ايىرۋ تۇرىندەگى جازا ەسكەرىلگەن.

وسى كودەكستىڭ 295-1-بابىنا سايكەس باعالى مەتالدار، اسىل تاستار، قۇرامىندا باعالى مەتالدار بار شيكىزات تاۋارلارىن زاڭسىز ساۋدالاعاندار 7 جىلعا دەيىن تۇرمەگە قامالۋى مۇمكىن.

ەسكە سالايىق، 22- شىلدەدە بەستوبە التىن كەنىشىندە ەر ادامنىڭ دەنەسى تابىلدى.

25- شىلدەدە تاعى ءبىر ادامنىڭ ءمايىتى مەن زارداپ شەككەن ءبىر ادام انىقتالدى. ولاردىڭ بارلىعى ءبىر جىلعا جۋىق ۋاقىتتان بەرى توقتاپ تۇرعان شاحتادا التىن كەنىن زاڭسىز ىزدەۋمەن اينالىسقان.