مەملەكەت باسشىسى گرۋزيانىڭ پرەمەر- ءمينيسترى يراكلي گاريباشۆيليدى قابىلدادى

نۇر- سۇلتان. قازاقپارات - قاسىم- جومارت توقايەۆ يراكلي گاريباشۆيليگە ءىلتيپات بىلدىرە وتىرىپ، ەكىجاقتى ىنتىماقتاستىقتىڭ قارقىندى دامىپ كەلە جاتقانىن، سونداي- اق بىرلەسكەن كۇش- جىگەردى جۇمىلدىرۋدىڭ ماڭىزدى ەكەنىن اتاپ ءوتتى، دەپ حابارلايدى قازاقپارات اقورداعا سىلتەمە جاساپ.

- ءسىزدىڭ ساپارىڭىز تابىستى بولادى دەپ ۇمىتتەنەمىن. ساپارىڭىزدىڭ باعدارلاماسى وتە تىعىز ەكەنىن، قازاقستان مەن گرۋزيا اراسىنداعى ىنتىماقتاستىقتى دامىتۋعا تىڭ سەرپىن بەرەتىن ءبىرقاتار كەزدەسۋ جوسپارلانعانىن بىلەمىن. ءبىزدى دوستىق جانە كوپجاقتى ىنتىماقتاستىقتىڭ بەرىك ارقاۋى بايلانىستىراتىنىن ايتقىم كەلەدى. ءبىزدىڭ مىندەتىمىز - وسى دوستىق قارىم- قاتىناستاردى جالعاستىرۋ جانە ودان ءارى دامىتۋ، - دەدى پرەزيدەنت.

كەزدەسۋ بارىسىندا قازاقستان مەن گرۋزيا اراسىنداعى ساۋدا- ەكونوميكالىق، ينۆەستيتسيالىق جانە گۋمانيتارلىق ىنتىماقتاستىقتىڭ وزەكتى ماسەلەلەرى تالقىلاندى. سونىمەن قاتار ولار كولىك- لوگيستيكالىق ءىس- قيمىلدارعا دا ەرەكشە نازار اۋداردى. كورشىلەس قىتايعا تىكەلەي شىعاتىن مۇمكىندىگى بار بولعاندىقتان، قازاقستان ءوز نارىعىن ورتالىق ازياعا اشىلاتىن قاقپا رەتىندە قاراستىرۋدى ۇسىنادى. مەملەكەتتەر ايماق ەلدەرى اراسىنداعى بايلانىستاردى نىعايتۋ ءۇشىن زور ماڭىزى بار ترانسكاسپي حالىقارالىق كولىك باعىتى بويىنشا سەرىكتەس سانالادى.

يراكلي گاريباشۆيلي كەزدەسۋگە مۇمكىندىك بەرگەنى ءۇشىن قاسىم- جومارت توقايەۆقا ريزاشىلىعىن ءبىلدىرىپ، ءوز ەلىنىڭ ىنتىماقتاستىقتى نىعايتۋعا مۇددەلى ەكەنىن تاعى دا ناقتىلادى.

- ءبىزدىڭ دوستىق جانە كوپجاقتى ىنتىماقتاستىعىمىز جاقسى دامىپ كەلەدى. مەن ماڭىزدى ماسەلەمەن كەلدىم. ەكىجاقتى قاتىناستاردى دامىتۋعا، بارلىق سالا بويىنشا بايلانىستاردى كەڭەيتۋگە مۇددەلىمىز. ەلدەرىمىز اراسىنداعى تاۋار اينالىمى ۇلعايىپ كەلەدى. ءبىرىنشى جارتىجىلدىقتا بۇل باعىتتاعى كورسەتكىش 150 پايىزعا ءوستى. ارينە، بايلانىستاردى كەڭەيتۋ ءۇشىن الەۋەتىمىز مول. ءبىز ءوزارا قارىم- قاتىناستاردى، ىنتىماقتاستىقتى جانە دوستىقتى باعالايمىز، - دەدى گرۋزيا پرەمەر- ءمينيسترى.

كەزدەسۋ سوڭىندا مەملەكەت باسشىسى قاسىم- جومارت توقايەۆ گرۋزيا پرەزيدەنتى سالومە زۋرابيشۆيليگە سالەمىن جولدادى.