ق ر وقۋ-اعارتۋ ءمينيسترى سوڭعى وقىعان ءۇش كىتابىن اتادى

نۇر-سۇلتان. قازاقپارات – ق ر وقۋ-اعارتۋ ءمينيسترى اسحات ايماعامبەتوۆ سوڭعى وقىعان ءۇش كىتابىن اتادى، دەپ حابارلايدى قازاقپارات ءتىلشىسى.

«كىتاپ وقىعان وتە ماڭىزدى. ءوز جۇمىسىمدا ءارتۇرلى تالداۋلاردى، ساراپتامالاردى، اقپاراتتى وقيمىن. وعان قوسا، ارينە، كوركەم ادەبيەتتى دە وقۋ پايدالى. سوڭعى وقىعان كىتاپتارىمنىڭ ءبىرى - مەتيۋ سايەدتىڭ «قارا جاشىك» پرينتسيپى» كىتابى. ودان كەيىن گارۆارد پروفەسسورى مايكل سەندەلدىڭ «تيرانيا زاسلۋگ» اتتى اعىلشىن تىلىندەگى كىتابىن وقىدىم. ءۇشىنشىسى، جۋىردا عانا رەمارك جازعان «ليسسابونداعى ءتۇن» كىتابىن وقىپ ءبىتىردىم. وندا ەكىنشى دۇنيەجۇزىلىك سوعىس ۋاقىتىنداعى وقيعالار باياندالادى. ءبىز «وقۋعا قۇشتار مەكتەپ» جوباسى اياسىندا مەكتەپ كىتاپحانالارىنا كوركەم ادەبيەتتەر ساتىپ الىپ، بالالاردى وقۋعا بەلسەندى تۇردە باۋلىپ جاتىرمىز جانە بۇل جۇمىستى ودان ءارى جالعاستىرامىز»، - دەدى اسحات ايماعامبەتوۆ.