سامۇرىق-قازىنا جابىلا ما؟
بۇل - مەملەكەت باسشىسىنىڭ قورعا قاتىستى جاساعان العاشقى ەسكەرتپەسى ەمەس. وسى ورايدا، قازاقپارات ءتىلشىسى «سامۇرىق-قازىنا» سىننان قانداي ساباق الىپ، جۇمىسىن جەتىلدىرۋدى قالاي جوسپارلاپ وتىرعانىن ءبىلىپ كوردى.
«مەملەكەت باسشىسىنىڭ قوردى رەفورمالاۋ تاپسىرماسىن ورىنداۋ شەڭبەرىندە جول كارتاسى دايىندالدى. ونىڭ ورىندالۋ بارىسى تۋرالى اقپارات جۇيەلى تۇردە پرەزيدەنت اكىمشىلىگىنە جولدانىپ وتىرادى. سونىمەن قاتار، جول كارتاسىنىڭ ورىندالۋى قوردىڭ اتقارۋشى ورگانىنىڭ تۇراقتى باقىلاۋىندا ەكەنىن اتاپ وتكەن ءجون. بيىل جول كارتاسى جۇكتەگەن 110 تاپسىرمانىڭ 33 ءى ورىندالدى. تاعى 13 شارا تۇراقتى جۇرگىزىلىپ تۇرادى. پىسىقتالىپ جاتقان 64 تاپسىرما بار. ۇكىمەتتىڭ كەڭەيتىلگەن وتىرىسىندا مەملەكەت باسشىسىنىڭ ايتقان سىن-پىكىرىن ەسكەرىپ، 19- شىلدەدە جول كارتاسىن ورىنداۋ بارىسى تۋرالى پورتفەلدىك كومپانيالاردىڭ ءبىرىنشى باسشىلارىنىڭ قاتىسۋىمەن كەڭەيتىلگەن وتىرىس وتكىزىپ، ارالىق ناتيجەلەر تىڭدالىپ، ءتيىستى تاپسىرمالار بەرىلدى»، - دەپ ءمالىم ەتتى قوردىڭ باسپا ءسوز قىزمەتىنەن قازاقپارات ءتىلشىسىنىڭ ساۋالىنا وراي.
سونىمەن قاتار، قور ميسسياسى قايتا قارالاتىنىن ءمالىم ەتتى. «ۇلتتىق ءال-اۋقات قورى تۋرالى» زاڭعا سايكەس، قور قىزمەتىنىڭ ماقساتى - «سامۇرىق-قازىنا» قۇرامىنا كىرەتىن ۇيىمداردىڭ ۇزاق مەرزىمدى قۇنىن ۇلعايتۋ جانە اكتيۆتەردى ءتيىمدى باسقارىپ، ۇلتتىق ءال-اۋقاتىن ارتتىرۋ ەدى. ال، دامۋ جوسپارى شەڭبەرىندە قور ميسسياسى قايتا قارالدى. ەندىگى ميسسيا - قازاقستان حالقىنىڭ مۇددەسى ءۇشىن ءارتاراپتاندىرىلعان اكتيۆتەر پورتفەلىن ءتيىمدى باسقارۋ جانە كاسىپكەرلىكتى قولداۋ ارقىلى ەكونوميكانىڭ تۇراقتى دامۋىن قامتاماسىز ەتۋ. 2023-2032-جىلدارعا ارنالعان دامۋ جوسپارىنىڭ جوباسى 14- شىلدەدە قور باسقارماسىنىڭ وتىرىسىندا كەلىسىلدى. جاقىن ۋاقىتتا قوردىڭ ديرەكتورلار كەڭەسى مەن ستراتەگيا جونىندەگى كوميتەتىندە قاراستىرىلادى»، - دەپ جوسپارلارىمەن ءبولىستى قوردىڭ باسپا ءسوز قىزمەتىنەن.
ەسكە سالا كەتەيىك، ۇكىمەتتىڭ كەڭەيتىلگەن وتىرىسىندا پرەزيدەنت قوردىڭ جۇمىسىن سىنعا الىپ، جۇمىستىڭ جۇيەلى بولۋى ءۇشىن بازالىق نورماتيۆتەردى قايتا قاراۋ قاجەت ەكەنىن باسا ايتقان ەدى.
