ءبىز ساۋد ارابياسىنا جوعارى ساپالى ءبيداي مەن ۇندى ۇزاق مەرزىمدى جەتكىزۋشى ەل بولۋعا دايىنبىز - توقايەۆ

نۇر-سۇلتان. قازاقپارات - مەملەكەت باسشىسى قاسىم-جومارت توقايەۆ ساۋد ارابياسىنا رەسمي ساپارى اياسىندا ىنتىماقتاستىقتى كەڭەيتۋدىڭ مەيلىنشە پەرسپەكتيۆتى سالالارىن بەلگىلەپ بەردى.

ەڭ الدىمەن، بۇل ەكىجاقتى ساۋدا-ساتتىققا قاتىستى، دەپ حابارلايدى اقوردانىڭ باسپا ءسوز قىزمەتى.

ونىڭ پىكىرىنشە، ىنتىماقتاستىقتىڭ مول الەۋەتىن ەكونوميكانىڭ ناقتى سەكتورىندا دا پايدالانۋعا بولادى.

پرەزيدەنت سونىڭ ىشەندە وتاندىق اگروسەكتوردىڭ الەۋەتىنە دە توقتالدى.

- قازاقستان ەگىستىك كولەمى بويىنشا جان باسىنا شاققاندا الەمدە ەكىنشى، جايىلىمدىق جەرلەر جونىنەن بەسىنشى ورىن (180 ميلليون گەكتار) الادى. ەلىمىز ءبيداي وسىرەتىن جانە ۇن وندىرەتىن 10 ءىرى مەملەكەتتىڭ قاتارىنا كىرەدى. ءبىز كورولدىككە جوعارى ساپالى ءبيداي، ۇن جانە مايلى داقىلداردى تۇراقتى ءارى ۇزاق مەرزىمدى جەتكىزۋشى ەلدەردىڭ ءبىرى بولۋعا دايىنبىز، - دەدى قاسىم-جومارت توقايەۆ.

تۋريزم سالاسىندا دا ىقپالداستىق ورناتۋعا زور مۇمكىندىكتەر اشىلادى. اتاپ ايتقاندا، مەملەكەت باسشىسى ساۋد كاسىپكەرلەرىنە قازاقستاننىڭ تۋريستىك- رەكرەاتسيالىق جوبالارىن قاراستىرىپ كورۋدى ۇسىندى.

سونىمەن قاتار قاسىم-جومارت توقايەۆ قازاقستاندا ينۆەستورلار ءۇشىن زاماناۋي ينستيتۋتسيونالدىق ورتا قالىپتاسقانىن ەسكە سالدى.

- وسى مۇمكىندىكتى پايدالانا وتىرىپ، قازاقستاننىڭ ساۋد ارابياسىمەن اراداعى ەكىجاقتى ىنتىماقتاستىقتى نىعايتۋعا جانە كەڭەيتۋگە بەيىلدى ەكەنىن راستاعىم كەلەدى. بۇگىن وسىندا بۇكىل الەمدە ايتارلىقتاي تابىستارعا قول جەتكىزگەن ساۋد ارابياسىنىڭ ءىرى كومپانيالارىنىڭ باسشىلارى قاتىسىپ وتىر. مەن ءبارىڭىزدى ءوزارا ءتيىمدى نەگىزدە قازاقستاندا بىرلەسە جۇمىس ىستەۋگە شاقىرامىن، - دەدى قازاقستان پرەزيدەنتى.