مەملەكەت باسشىسى سانجار جاركەشوۆتى قابىلدادى
باسپا ءسوز قىزمەتىنىڭ مالىمەتىنشە ، پرەزيدەنتكە «QazaqGaz» ۇ ك» اكسيونەرلىك قوعامىنىڭ بيىلعى ءبىرىنشى جارتىجىلدىقتا اتقارعان قارجى-شارۋاشىلىق جۇمىستارىنىڭ قورىتىندىسى، سونداي- اق ىشكى نارىقتى تاۋارلىق گازبەن قامتاماسىز ەتۋ جونىندەگى تاپسىرماسىنىڭ ورىندالۋ بارىسى تۋرالى ەسەپ بەرىلگەن.
قاسىم-جومارت توقايەۆقا ۇلتتىق كومپانيانىڭ قابىلداعان شۇعىل شارالارى ىشكى نارىقتاعى تاۋارلىق گازدىڭ تاپشىلىعىن بولدىرماۋعا مۇمكىندىك بەرگەنى جونىندە باياندالدى.
سانجار جاركەشوۆتىڭ ايتۋىنشا، قازىرگى تاڭدا ىشكى نارىقتىڭ گازعا دەگەن سۇرانىسى تولىق قامتاماسىز ەتىلگەن.
QazaqGaz قاشاعاندا قۋاتى 1 ميلليارد تەكشە مەتر بولاتىن گاز وڭدەۋ زاۋىتىن سالۋعا كىرىسكەن. گازدى بارلاۋ جانە ءوندىرۋ جونىندەگى جاڭا جوبالاردى ىسكە قوسۋ ارقىلى رەسۋرستىق بازانى ۇلعايتۋ جۇمىستارى جۇرگىزىلىپ جاتىر.
سونداي-اق گاز سالاسىن دامىتۋدىڭ 2022-2026-جىلدارعا ارنالعان كەشەندى جوسپارى بەكىتىلگەن.
مەملەكەت باسشىسىنا كومپانيانىڭ قىزمەتىنە جۇرگىزىلىپ جاتقان كەشەندى تەكسەرۋ جۇمىسىنىڭ بارىسى تۋرالى مالىمەت بەرىلدى.
قازاقستاننىڭ گاز تاسىمالداۋ جۇيەسىنە حالىقارالىق تەحنيكالىق اۋديت جۇرگىزىلۋدە. ۇلتتىق كومپانيانىڭ شىعىندارىن وڭتايلاندىرۋ ناتيجەسىندە جىل باسىنان بەرى 9 ميلليارد تەڭگە ۇنەمدەلدى.
بۇدان بولەك «QazaqGaz» ۇ ك» ا ق باسقارما ءتوراعاسى گازعا قوسىلۋ جونىندەگى تەحنيكالىق شارتتاردى بەرۋ ءۇشىن تالاپ ەتىلەتىن قۇجاتتار ءتىزىمىن قىسقارتۋ جۇمىستارى جۇرگىزىلىپ جاتقانىن ايتتى.
باعا بەلگىلەۋدىڭ الەۋمەتتىك ءادىل رەفورماسىنا قاتىستى شارالار كەشەنى ازىرلەنىپ، قاراۋعا ۇسىنىلدى. پرەزيدەنت ءبىرقاتار مىندەت جۇكتەدى، سونىڭ ىشىندە ەلىمىزدەگى گازبەن قامتۋ جۇمىستارىنىڭ قارقىنىن ارتتىرۋ جونىندە تاپسىرما بەردى.
