قازاقستان پرەزيدەنتى شولپان-اتادا مۇحتار اۋەزوۆتىڭ بيۋستىن اشتى
مەملەكەت باسشىسى مۇحتار اۋەزوۆتىڭ شولپان-اتا قالاسىنداعى مۋزەي-ۇيىنە باردى.
پرەزيدەنت مۋزەي-ۇيدە مۇحتار اۋەزوۆتىڭ بيۋستىن اشتى جانە قۇرمەتتى قوناقتار كىتابىنا قولتاڭبا قالدىردى.
ايتا كەتەيىك، مۇحتار اۋەزوۆتىڭ شولپان-اتاداعى ءۇيى 1959-جىلى سالىنعان. قازاقتىڭ ۇلى جازۋشىسى بۇل ۇيدە 1959-1961-جىلدارى تۇرىپ، جۇمىس ىستەگەن، سونداي-اق ءوزىنىڭ «وسكەن وركەن» اتتى سوڭعى رومانىن جازۋدى باستاعان.
ءبىراق اياقتاپ ۇلگەرمەدى. 1970-جىلى قىركۇيەكتە مۇندا مۇحتار اۋەزوۆتىڭ كىتاپحانا-مۋزەيىنىڭ رەسمي اشىلۋ ءراسىمى ءوتتى.
قازىرگى ۋاقىتتا مۋزەيدە جازۋشىنىڭ جەكە زاتتارى: ۇستەل، ورىندىقتار، تەربەلمەلى كرەسلو، ۇستەل ساعاتى، كيىم ىلگىش، كىتاپ شكافى، كىتاپتار ساقتالعان.
جازۋشىنىڭ قىزى ءلايلا مۇحتار قىزىنىڭ باستاماسىمەن كىتاپحاناعا العاشقى 5000 دانا كىتاپ جينالدى.
قازىر كىتاپحاناداعى كىتاپ قورى - شامامەن 12000. كىتاپحانا-مۋزەيدە سەمينارلار، وقۋ كونفەرەنسيالارى، كەزدەسۋلەر وتكىزىلىپ تۇرادى.
