قازاقستان مازاري- شاريف- كابۋل - پەشاۆار تەمىرجولىنىڭ قۇرىلىسىنا قاتىسۋعا دايىن - پرەزيدەنت
«ءتورتىنشى. وڭىردە كولىك بايلانىسىن ارتتىرىپ، ترانزيت شارتتارىن دايەكتى تۇردە جاقسارتۋ قاجەت. ءتىپتى ءوڭىردىڭ كارتاسىنا اسىعىس كوز تاستاعان ادامنىڭ ءوزى ورتالىق ازيانىڭ ورنالاسقان گەوگرافيالىق جاعدايى بىرەگەي ەكەنىن كورەدى. جاڭا گەوساياسي احۋال جاعدايىندا ءبىزدىڭ ءوڭىردىڭ كونتينەنتارالىق ساۋدا- ساتتىقتى دامىتۋ مەن ىلگەرىلەتۋ جولىنداعى ءرولى ەكپىندەپ ءوسىپ كەلەدى»، - دەدى قاسىم- جومارت توقايەۆ.
پرەزيدەنت قازاقستان بۇل تۇرعىدا ترانسكاسپي حالىقارالىق كولىك مارشرۋتىن بەلسەندى دامىتىپ جاتقانىن ەسكە سالدى.
«2017 -جىلدان باستاپ وسى ءدالىز ارقىلى كونتەينەر تاسىمالداۋ 3 ەسەدەي ءوستى. ونىڭ ۇستىنە قازاقستان «مازاري- شاريف - كابۋل - پەشاۆار» تەمىرجولىنىڭ قۇرىلىسىنا قاتىسۋعا دايىن. ءبىز قۇرىلىمى جوعارى تاۋارلاردىڭ ۇزدىكسىز جەتكىزىلۋىن قامتاماسىز ەتىپ، جىلجىمالى قۇرام ۇسىنا الامىز»، - دەدى مەملەكەت باسشىسى.
«كوپ جاعدايدا سانكسيالىق سوعىستاردىڭ ارانداتۋىنان جانە ارتا تۇسكەن پروتەكتسيونيزمنەن تونگەن جاھاندىق قۇلدىراۋ قاتەرى وڭىرلىك ەكونوميكالىق ىنتىماقتاستىقتى قارقىندى دامىتۋ ماسەلەسىن ءبىرىنشى ورىنعا شىعارادى. وندىرىستىك جانە جاپپاي جەتكىزىلىمنىڭ ساۋدا تىزبەكتەرىنىڭ ءۇزىلۋى جاعدايىندا ايماقتانۋ تەندەنتسياسى بارىنشا ايقىن كورىنە باستادى»، - دەدى قازاقستان پرەزيدەنتى ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋىندە.
مەملەكەت باسشىسىنىڭ اتاپ وتۋىنشە، وسىنداي جايتتىڭ اياسىندا ورتالىق ازيا ەلدەرى اراسىنداعى ساۋدا كورسەتكىشى قولدا بار الەۋەتتى تولىق كورسەتە المايدى.
«ورتالىق ازيالىق ەكونوميكالىق كووپەراتسيا باستى بولماسا دا، قالاي بولعاندا دا ءبىزدىڭ ۇلتتىق ەكونوميكالارىمىزدىڭ نەگىزگى ءوسىم كوزىنە اينالۋى ابدەن مۇمكىن»، - دەدى قاسىم- جومارت توقايەۆ.
ايتا كەتەيىك، قىرعىز رەسپۋبليكاسىنىڭ شولپان- اتا قالاسىندا ورتالىق ازيا مەملەكەتتەرى باسشىلارىنىڭ IV كونسۋلتاتيۆتىك كەزدەسۋى ءوتىپ جاتىر. جيىنعا قازاقستان، قىرعىزستان، تاجىكستان، تۇرىكمەنستان، وزبەكستان كوشباسشىلارى قاتىسۋدا.
