پرەزيدەنت سىنىنان كەيىن كيىك پوپۋلياتسياسىن رەتتەۋ ماسەلەسى قايتا تالقىلاندى - مينيستر

نۇر- سۇلتان. قازاقپارات - ەلىمىزدە كيىكتەردىڭ پوپۋلياتسياسىن رەتتەۋ ماسەلەسى عىلىمي زەرتتەۋدىڭ ناتيجەسىنەن كەيىن ناقتىلانادى.

بۇل تۋرالى ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ءمالىم ەتتى، دەپ حابارلايدى قازاقپارات ءتىلشىسى.

«پرەزيدەنت سىنىنان كەيىن بارلىق مۇددەلى مەملەكەتتىك ورگاندارمەن، قاۋىمداستىقتار جانە عالىمدارمەن تاعى دا جينالدىق. كيىكتەر پوپۋلياتسياسىن رەتتەۋ جانە پايدالانۋ ماسەلەسى قايتا تالقىلاندى. ءبىز بۇل باعىتتاعى جۇمىستاردى، عىلىمي زەرتتەۋلەردى تەرەڭىرەك جۇرگىزۋ قاجەت دەگەن قورىتىندىعا كەلدىك. ياعني كيىكتەردىڭ كوشى- قون جولدارىن، تىرشىلىك ەتۋ ورتاسىن، جەم- ءشوپ بازاسىن قاراۋ كەرەك»، - دەدى سەرىكقالي برەكەشيەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

مينيستر اقبوكەندەردىڭ پوپۋلياتسياسى ۇنەمى ءوسىپ وتىرمايتىنىن ءتۇسىندىردى. ونىڭ ايتۋىنشا، بەلگىلى شەك بار، سودان كەيىن كيىكتەر جەم- ءشوپ ءۇشىن ءوزارا باسەكەگە تۇسەدى.

«ىشكى باسەكەلەستىكتىڭ ارتۋى جانۋاردىڭ ءوزىن السىرەتەدى. سوندىقتان وسى ماسەلەنىڭ بارلىعىن تاعى دا قاراستىرامىز. سودان كەيىن ءبىز دۇرىس شەشىمگە كەلەمىز. ءبىراق، ەگەر تاريحي تۇرعىدان الساق، كەڭەس زامانىندا كيىكتەردىڭ پوپۋلياتسياسىن رەتتەۋ تاجىريبەسى بولدى جانە ولاردىڭ سانى ساقتالدى»، - دەيدى ول.

سونداي- اق، مينيستر كيىكتەر تاعدىرىنا قاتىستى شەشىم عىلىمي زەرتتەۋلەردىڭ ناتيجەسىنەن كەيىن قابىلداناتىنىن ايتىپ وتىر. ايتۋىنشا، عىلىمي زەرتتەۋلەر 1-2 جىلعا سوزىلۋى مۇمكىن. «زەرتتەۋدىڭ العاشقى ناتيجەلەرى بەلگىلى بولعانعا دەيىن كيىكتەردىڭ پوپۋلياتسياسىن رەتتەۋ نەمەسە پايدالانۋ تۋرالى شەشىم قابىلدانبايدى»، - دەپ تولىقتىردى سەرىكقالي برەكەشيەۆ.

اۆتور: ءالي يبرايەۆ