پرەزيدەنت مەكتەپ قابىرعاسىندا زورلىق- زومبىلىقتىڭ كوبەيىپ كەتكەنىنە الاڭداۋشىلىق تانىتتى
بۇل تۋرالى ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«ادام كاپيتالىن دامىتۋ ىسىندە ءبىلىم سالاسى نەگىزگى ءرول اتقارادى. ءبىز جۋىردا ءبىلىم جانە عىلىم مينيسترلىگىن ەكىگە بولدىك. بۇل قادام قوردالانعان ماسەلەلەردى شەشۋ ءۇشىن قاجەت بولدى. ۇكىمەت جانە جاڭا مينيسترلىكتەردىڭ باسشىلارى وتاندىق ءبىلىم جانە عىلىم سالاسىن تىڭ سەرپىنمەن دامىتۋعا كۇش سالادى دەپ سەنەمىن»، - دەدى مەملەكەت باسشىسى. ق ر پرەزيدەنتى وسى جىلدى بالالار جىلى دەپ جاريالاعانىن اتاپ ءوتتى.
«ءبىراق، سوڭعى جىلدارى مەكتەپ قابىرعاسىندا زورلىق- زومبىلىقتىڭ كوبەيىپ كەتكەنى الاڭداتادى. ونىڭ ۇستىنە، تولىق جابدىقتالعان مەكتەپتەردىڭ 65 پايىزىندا، ياعني 3 مىڭ مەكتەپتە بەينەباقىلاۋ جۇيەسى تالاپقا ساي ەمەس، كەيدە مۇلدەم جۇمىس ىستەمەيدى. جالپى، ەلىمىز بويىنشا بالالار مەن جاسوسپىرىمدەردىڭ ءوز-وزىنە قول سالۋى، ياعني سۋيتسيد ازايدى. دەگەنمەن، الماتى، جامبىل، قوستاناي جانە ماڭعىستاۋ وبلىستارىندا مۇنداي وقيعالار كوبەيىپ بارادى. بالالاردى زورلىق- زومبىلىقتان قورعاۋعا، سۋيتسيدتىڭ الدىن الۋعا، ءاربىر بالانىڭ قۇقىقتارىن قامتاماسىز ەتۋگە ارنالعان كەشەندى جوسپار قاجەت»، - دەدى قاسىم-جومارت توقايەۆ.
