ۇلتتىق بانك ۆاليۋتا نارىعى تۋرالى: ماۋسىم ايىندا ۆاليۋتالىق وكتەمدىك جۇرگىزىلگەن جوق

نۇر-سۇلتان. قازاقپارات - ماۋسىم ايىنىڭ باسىنان باستاپ ۇلتتىق بانك التىن-ۆاليۋتا رەزەرۆتەرى ەسەبىنەن ايىرباس باعامىنا ىقپال ەتۋ ماقساتىندا ساۋدا-ساتتىققا قاتىسقان جوق، ياعني، ينتەرۆەنتسيا جۇرگىزگەن جوق.

بۇل تۋرالى ق ر ۇلتتىق بانكىنىڭ مونەتارلىق وپەراتسيالار دەپارتامەنتى ديرەكتورىنىڭ ورىنباسارى يۆان سەرديۋك تۇسىندىرمەسىندە ايتىلعان، دەپ حابارلايدى قازاقپارات.

«ادەتتەگىدەي، ماۋسىمدا جۇرگىزىلگەن ۆاليۋتا نارىعىنداعى وپەراتسيالار بويىنشا اقپاراتتى، ياعني، التىن-ۆاليۋتا اكتيۆتەرى بولسىن، ۇلتتىق قور نەمەسە بجزق بولسىن، ءبىز كەلەسى ايدىڭ ءبىرىنشى جۇمىس كۇنىندە جاريالايمىز. سونىمەن قاتار، بيۋدجەتكە ترانسفەرتتەردى جۇزەگە اسىرۋ ءۇشىن ۇلتتىق قور اتىنان شەتەل ۆاليۋتاسى ساتىلدى، ماۋسىم ايىنىڭ باسىنان بەرى ونىڭ كولەمى 408 ميلليون ا ق ش دوللارىن قۇرادى. سونداي-اق، ساراپشىلاردىڭ نازارىن تەڭگەنىڭ قۇبىلمالى ايىرباس باعامى ماسەلەسىنە اۋدارساق دەيمىن»، - دەيدى ۇلتتىق بانك وكىلى.

سونداي-اق ول سوزىندە ناۋرىزدان باستاپ تەڭگە باعامىنىڭ قۇبىلمالىلىعى %1,2 عا باعالانىپ كەلگەنىن ايتتى.

«سالىستىرمالى تۇردە العاندا برازيليا رەالىنىڭ وسى ۋاقىت ىشىندە قۇبىلمالىلىعى - %1,2، مەكسيكا پەسوسى - %0,7، دامىعان نارىقتاردان: فۋنت - %0,7، ەۋرو - %0,6. بۇل كورسەتكىشتەر ەركىن وزگەرمەلى باعىتتىڭ تولىققاندى رەجيمىنە بەيىلدىلىكتى كورسەتەدى، بۇل ەكونوميكانىڭ تەڭگەرىمسىزدىگىن ابسورباتسيالاۋعا جانە ەلدىڭ التىن-ۆاليۋتا اكتيۆتەرىن ساقتاۋعا مۇمكىندىك بەرەدى. ۆاليۋتالار باعامى سىرتقى ىرگەلى فاكتورلاردىڭ وزگەرىستەرىنە تىكەلەي سايكەس كەلمەيدى، سوڭعى كۇندەرى كورىپ وتىرعانىمىزداي، ىشكى فاكتورلار باسىمىراق ىقپال ەتۋدە. قىسقا مەرزىمدى پەرسپەكتيۆادا تەڭگەنىڭ قۇبىلمالىلىعى گەوساياسي جاعدايدىڭ وزگەرۋىنە، ىشكى قاتىسۋشىلاردىڭ كۇتۋلەرىنە جانە الەمدىك نارىقتارداعى احۋالعا بايلانىستى بولادى»، - دەيدى يۆان سەرديۋك.