الماتى اۋماعى بەي- بەرەكەت جايىلىپ، ۇيلەسىمسىز ءوستى - ەربولات دوسايەۆ

None
None
الماتى. قازاقپارات - ءبىر ميلليون ادامعا عانا ەسەپتەلگەن الماتى سوڭعى جىلدارى ۇيلەسىمسىز ءوستى. بۇل تۋرالى ەربولات دوسايەۆ قالا قۇرىلىسى فورۋمىندا ايتتى، دەپ حابارلايدى قازاقپارات ءتىلشىسى.

«قالا وتە تەز ءوستى، سوندىقتان مەگاپوليس پەن ونىڭ تۇرعىندارىنىڭ قاجەتتىلىكتەرىن قاناعاتتاندىرۋ ءۇشىن شۇعىل شەشىمدەر قابىلداۋ كەرەك بولدى. ونىڭ ۇستىنە، قالا ۇيلەسىمسىز ءوستى، ويتكەنى، 1 ميلليون ادامعا عانا ەسەپتەلگەن»، - دەيدى اكىم.

ونىڭ ايتۋىنشا، ءار قالا ءوز دامۋ جولىن تاڭداۋى ءتيىس.

«قالانىڭ دامۋ جوسپارىنا جاڭادان قوسىلعان اۋماقتار مەن الماتىنىڭ جاڭا اۋداندارىن قۇرۋ ماسەلەسى ۇلكەن وزگەرىستەر ەنگىزدى. ءبىز بۇگىن ىزدەنىس ۇستىندەمىز. قالا قالاي دامىعانى ءجون - وسىنى انىقتاۋ قاجەت. ءار قالا ءوزىنىڭ دامۋ جولىن تاڭدايدى. الدىن الا ايتارىم، الداعى دۇيسەنبىدە قالاعا قاتىستى ماڭىزدى شەشىمدەر قابىلدايتىن ءماسليحات وتىرىسى وتەدى. بۇل - قۇرىلىس ەرەجەلەرىن وزگەرتۋ جانە قالا قۇرىلىسى كەڭەسىن قايتارۋ تۋرالى شەشىمدەر»، - دەدى قالا باسشىسى.

سونىمەن قاتار، ول 2023 -جىلدان باستاپ قالانىڭ ساۋلەت بەينەسىنە كونكۋرس جاريالاناتىنىن ايتتى.

«كرەاتيۆتى ەكونوميكانى دامىتۋ رەيتينگى بويىنشا ەلىمىزدە كوشباسشى پوزيتسياسىندا تۇرمىز. الماتى تۇرعىندارى وتە دارىندى. 2023 -جىلدان باستاپ قالانىڭ ارحيتەكتۋرالىق بەينەسىنە كونكۋرس جاريالانادى. ءبىز ەندى ءبىر نۇسقانى قابىلدامايمىز، قالا ەڭ جاقسى جوبالاردى تاڭداۋعا قۇقىلى بولادى. كومپانيالار ءۇشىن جەر اۋكسيوندارى ۇيىمداستىرىلادى. ەڭ جاقسى جوبانى كىم ۇسىنسا، قالا سوعان ارتىقشىلىق بەرەدى. ونىڭ ۇستىنە جەكە ينۆەستيتسيانىڭ ءرولىن ارتتىرۋ كەرەك دەپ سانايمىن، سوندىقتان جەكەمەنشىك يەلەرى قالاعا، ەلگە عانا ەمەس، وزدەرى ءۇشىن دە قالاتىن اكتيۆتى العىسى نەمەسە سالعىسى كەلەدى»، - دەدى ەربولات دوسايەۆ.

مەگاپوليس باسشىسى باس جوسپارعا سايكەس قالا ءۇشىن جارعى نەمەسە كودەكس بولۋى كەرەك ەكەنىن تىلگە تيەك ەتتى.

«الماتى بۇرىن سالىنعان ساۋلەت جەتىستىكتەرىمەن ءومىر ءسۇرىپ جاتىر. ولاردى ارلەيمىز ءارى رەتكە كەلتىرەمىز. شىن مانىندە، جاڭا الماتىنىڭ، جاڭا قازاقستاننىڭ سيمۆولىنا اينالعان نارسەلەر ساۋساقپەن سانارلىق. مەن ولاردىڭ كوپ بولعانىن قالايمىن. ول ءۇشىن جاعداي جاسايمىز. تۇرعىن ءۇي قۇرىلىسىنىڭ شەكاراسىن ناقتى ءبولۋىمىز كەرەك. سونداي- اق، قالا ارحيتەكتۋراسى دەگەن نە جانە تۇرعىن ۇيمەن قامتاماسىز ەتۋ تۇرىندەگى الەۋمەتتىك پروبلەمالاردى شەشۋ دەگەن ەكى ماسەلەنى ءبولىپ قاراعان ءجون. باس جوسپارعا سايكەس قالا ءۇشىن جارعى نەمەسە كودەكس بولۋى كەرەك جانە ول قاتاڭ ساقتالۋى ءتيىس»، - دەدى ول.

ونىڭ ايتۋىنشا، بىرنەشە جىل بويى الماتى اكىمدىگى باس جوسپارعا تۇزەتۋ ەنگىزۋ ءۇشىن جۇمىس ىستەدى.

«ۇلكەن جۇمىس اتقارىلدى. ءبىراق، وكىنىشكە قاراي، باس جوسپاردى تۇزەتۋ 2002 -جىلى بەكىتىلگەن باس جوسپارعا نەگىزدەلگەن. ودان بەرى جيىرما جىل ءوتتى. قازىر قالا دا، ەكونوميكا دا وزگەردى. الماتى وبلىسى دا وزگەردى. باس جوسپاردى تۇزەتۋگە اتسالىسقانداردىڭ بارىنە العىس ايتقىم كەلەدى، وعان 3-4 جىل ۋاقىت كەتتى، ءبىراق ءبىز جىل سوڭىنا دەيىن الماتى قالاسىن دامىتۋدىڭ جاڭا باس جوسپارىن ۇسىنامىز»، - دەدى اكىم.

اكىمنىڭ سوزىنشە، بۇگىندە قالا مەن قالا ماڭىنداعى اۋماقتاردى بىردەي دامىتۋ ماڭىزدى. جاڭا باس جوسپاردا اگلومەراتسيانىڭ ۋرباندالۋ پروتسەسىن جەدەلدەتۋ تەتىكتەرى دە قاراستىرىلادى. «بولجامدىق ەسەپ بويىنشا، 2030 -جىلعا قاراي الماتى اگلومەراتسياسىنىڭ حالقى شامامەن 4,5 ميلليون ادامعا جەتەدى. وسى تەندەنسيالار مەن جەدەل دامۋ جانە ۋربانيزاتسيا پروتسەستەرىنىڭ بولجامىن ەسكەرە وتىرىپ، الماتى اكىمدىگى 2040 -جىلعا دەيىنگى بولجامدى مەرزىمى بار جاڭا باس جوسپاردى ازىرلەۋگە كىرىستى»، - دەدى ەربولات دوسايەۆ.


سوڭعى جاڭالىقتار